रुपन्देही ।
लगातारको वर्षाका कारण प्रदेशका विभिन्न जिल्ला प्रभावित हुन पुगेका छन् । कतिपय जिल्लामा बाढी र पहिरोले मानवीय क्षति समेत भएको छ । कतिपय जिल्लामा किसानले लगाएका तरकारी बालीलाई असर पु¥याएको छ । बुटवलको तिनाउ नदीमा आएको बाढीले आज बुटवल–१७ रानीगञ्जमा प्रेमकुमारी खाम्चाका चार कोठाको कच्ची घर बगाएको जिल्ला प्रहरी कार्यालयका प्रवक्ता खड्कबहादुर खत्रीले जानकारी दिनुभयो ।
अहिले खाम्चा परिवारले छिमेकीको घरमा आश्रय लिएका छन् । त्यस्तै रानीगञ्ज क्षेत्रका चार घर बाढीको जोखिममा परेपछि प्रहरी र स्थानीयवासीको सहयोगमा घरका सामान सारिएको प्रहरी प्रवक्ता खत्रीले बताउनुभयो ।
वर्षा कारण तिनाउ नदीमा पानीको सतहले खतराको तह पार गरेको छ । नदीको पानीको सतह बढेपछि बुटवल उपमहानगरपालिका तथा अन्य पालिकाका जनप्रतिनिधिहरुले स्थलगत अवलोकन गर्नुभएको छ । लगातारको वर्षाका कारण जिल्ला लुम्बिनी, मर्चवारीलगायत विभिन्न पालिका जलमग्न भएका छन् । रासस
