एजेन्सी ।
युरोपमा कोरोना भाइरसको दोश्रो लहर बढेपछि विभिन्न देशमा पुनः लकडाउन सुरु भएको छ । फ्रान्स र बेलायतपछि इटालीमा पनि फेरि लकडाउन घोषणा गरिएको छ ।
इटालीका विभिन्न क्षेत्रलाई तीन भागमा बिभाजन गरी शुक्रबारदेखि दुई हप्तासम्म लकडाउन गरिएको हो ।
इटालीका चार क्षेत्रहरु लोम्बार्डिया, पिओमोन्ते, कालाबृया र भाले डि ओस्टालाई रेड जोन घोषणा गरिसकिएको छ। यी क्षेत्रहरु कोराना भाइरसको संक्रमण धेरै छ।
कोरोनाको दोस्रो लहर रोक्न र अस्पतालमा कोरोनाले बढेको चाप कम गर्न लकडाउन गरिएको इटालीका प्रधानमन्त्री जुजेप्पे कन्तेले बताएका छन् ।
यसअघि इटालीमा पहिलोपटक गत मार्च महिना लकडाउन गरिएको थियो । लकडाउनको रेड जोन घोषणा गरिएका प्रदेशहरूबाट मानिसहरुलाई आउजाउ गर्न रोक लगाइएको छ ।
स्वास्थ्यसहितका अत्यावश्यक काममा भने सेल्फ प्रमाणीकरणको सर्टिफिकेटसहित बाहिर निस्कन दिइने जनाइएको छ ।
संक्रमणको संख्या अत्यधिक बढेसँगै इटालीका अस्पतालमा बिरामी राख्ने ठाँउको पनि अभाव हुन थालेको बताइएको छ ।
वर्ल्डो मिटर्सका अनुसार इटालीमा कोरोनाका कारण ४० हजार १९२ जनाको मृत्यु भएको छ । संक्रमित संख्या ८ लाख २४ हजार ८७९ छ । पछिल्लो २४ घण्टामा मात्रै त्यहाँ ३४ हजार संक्रमित थपिएका छन् ।
यस अघि बेलायत, फ्रान्स लगायतका अन्य युरोपेली देशमा दोश्रो चरणको लकडाउन गरिएको छ । भाइरसको जोखिम बढेपछि विभिन्न देशमा दोश्रो चरणका लकडाउन हुन थालेका हुन् ।
