एजेन्सी ।
इटालियन क्लब युभेन्टसले च्याम्पियन्स लिग फुटबलको अन्तिम १६ मा स्थान बनाएको छ । समूह जी अन्तर्गत मंगलबार राति भएको खेलमा पुनरागमन गरि फेरेन्क्भारोसी टिसीलाई २–१ ले पराजित गरि युभेन्टसले नकआउट चरणमा स्थान बनाएको हो ।
अवे मैदानमा भएको खेलमा १९ औँ मिनेटमा म्यार्तो उजुनीले गोल गरि हंगेरियन क्लब टिसीलाई अग्रता दिलाए ।
पछि परेको युभेन्टसका लागि क्रिष्टियानो रोनाल्डोले ३५ औँ मिनेटमा बराबरी गोल फर्काए । उनले क्लब र राष्ट्रिय टिमबाट गरि खेल जीवनको ७४९ औँ गोल गरेका हुन ।
यस्तै इन्जुरी समयको दोस्रो अर्थात ९२ औँ मिनेटमा अल्भारो मोराटाले गोल गरेपछि युभेन्टस २–१ ले विजयी भयो ।
चार खेलबाट ९ अंक बनाएको युभेन्टसले समूह जी बाट अन्तिम १६ मा पुग्ने पक्का भएको हो । यो समूहबाट बार्सिलोनाले पनि नकआउट चरणमा स्थान बनाएको छ ।