एजेन्सी ।
अमेरिका वरिष्ठ सरुवा रोग विशेषज्ञ डा. एन्थोनी फाउचीले अमेरिकामा कोरोना महामारी थप भयावह बन्ने चेतावनी दिएका छन् ।
आगामी दिनमा संक्रमण थप र लगातार वृद्धि हुने सम्भावना रहेको भन्दै फाउचीले थ्याङ्गसगिभिङ्गको बिदाका लागि दशौँ लाख अमेरिकी विभिन्न शहरबाट घर गएकाले त्यसको प्रभाव नकारात्मक पर्ने बताएका हुन् । आउँदा हप्ताहरुमा कोरोना भाइरसको संक्रमण अहिले भन्दा अझ तीव्र गतिमा बिस्तार हुने सम्भावना रहेको फाउचीको भनाई छ ।
उनले भनेका छन्, ‘मास्क लगाउने तथा भौतिक र सामाजिक दूरी कायम गर्ने हो भने धेरै हदसम्म सम्भावित संक्रमण रोक्न वा फैलिन नदिन सकिन्छ।’
महामारीका कारण सबैभन्दा बढि प्रभावित भएको अमेरिकामा कुल संक्रमितको संख्या एक करोड ३३ लाख ७४ हजार भन्दा धेरै पुगेको छ। यस्तै कोभिड–१९ का कारण अहिलेसम्म अमेरिकामा दुई लाख ६६ हजार ८ सय भन्दा धेरैको ज्यान गएको छ ।
