जनादेश, काठमाण्डौ ।
प्रमुख प्रतिपक्षी दल नेपाली कांग्रेसले सोमबार सरकार विरुद्ध शक्ति प्रदर्शन गरेको छ । एकसाथ देशैभर विरोध कार्यक्रम गरेर कांग्रेसले सरकारको खबरदारी गरेको हो ।
सरकारविरुद्धको प्रदर्शनलाई सम्बोधन गर्न कांग्रेसका शीर्ष नेताहरु विभिन्न जिल्ला पुगेका थिए । हेटौंडामा आयोजित विरोध सभालाई सम्बोधन गर्दै कांग्रेस सभापति शेरबहादुर देउवाले सरकारकै कारण सडकमा ‘राजा आऊ देश बचाऊ’ को नारा लागेको टिप्पणी गरे ।
प्रधानमन्त्री केपी शर्मा ओली नै राजावादीसँग मिलेको त होइन भन्ने आशंकासमेत देउवाले व्यक्त गरेका छन् । उनले एकदलीय सर्वसत्तावादी शासन लागू गर्न खोजेको भन्दै सरकारको चर्को आलोचना गरे ।
काठमाडौँमा आयोजना गरेको विरोधसभालाई सम्बोधन गर्दै बरिष्ठ नेता रामचन्द्र पौडेलले नेकपा अध्यक्ष केपी शर्मा ओली नेतृत्वको सरकार संविधान र व्यवस्थालाई कमजोर बनाउन लागि परेको आरोप लगाए । पौडेलले सरकार भ्रष्टाचारमा लागेको, जनताबाट टाढा भएको कुरा विपक्षीले भनिरहनु नपर्ने बताए ।
धनगढीमा सरकारविरुद्ध गरिएको प्रदर्शनपछि आयोजित विरोधसभालाई सम्बोधन गर्दै नेता गगन थापाले नेकपाको सरकारले जनताका लागि केही गर्न नसकेको आरोप लगाए । थापाले केपी ओली नेतृत्वको सरकारले मनोमानी गरिरहेको भन्दै ठेगानमा ल्याएरै छोड्ने चेतावनी दिए ।
