जनादेश, काठमाडौँ ।
परिषद् सम्बन्धि अध्यादेश फिर्ता लिने सहमति गरेपछि पनि प्रधानमन्त्री केपी शर्मा ओलीले संवैधानिक परिषद्को बैठक बोलाएका छन् । नेकपा स्थायी कमिटीले अध्यादेश फिर्ताको निर्णय गरेको एक दिनपछि ओलीले परिषद् बैठक बोलाएका हुन् ।
आज साँझ बस्ने बैठकको जानकारी विपक्षी दलका नेता शेरबहादुर देउवालाई पनि दिइएको तर देउवा नजाने स्रोतले बताएको छ ।
प्रधानमन्त्री अध्यक्ष रहने संवैधानिक परिषदमा सभामुख, राष्ट्रियसभाका अध्यक्ष, प्रधानन्यायाधीश, विपक्षी दलका नेता र उपसभामुख सदस्य रहन्छन् । परिषदले विभिन्न संवैधानिक अंगका पदाधिकारी नियुक्तिका लागि सिफारिस गर्ने गर्छ ।
पछिल्लो संशोधन अध्यादेश कार्यान्वनमै रहेकाले ओलीले बहुमतको आधारमा नियुक्ति समेत गर्ने प्रावधान छ । साँझ ५ बजे बैठकका लागि बोलाइएको बैठकको उद्देश्य खुलेको छैन ।
