जनादेश, काठमाडौँ ।
राष्ट्रियसभा सदस्य रामनारायण बिडारीले व्यवस्था सिध्याउने प्रयासस्वरुप प्रतिनिधि सभा विघटन गरिएको टिप्पणी गरेका छन् । आज काठमाडौंमा आयोजित प्रतिनिधिसभा विघटन सम्बन्धि अन्तरक्रियामा संविधानका जानकारसमेत रहेका विडारीले यस्तो टिप्पणी गरेका हुन् ।
प्रतिनिधि सभा नभएपछि संविधानको ५० प्रतिशत धाराहरु निस्क्रिय हुने भन्दै उनले सत्तामा भएको मान्छेलाई मिलाएर व्यवस्था विरोधीहरुले योजनाबद्धरुपमा विघटन गराएको आरोप लगाए ।
संविधानमा ५ वर्षमा निर्वाचन गरिने व्यवस्था गरिएको भएपनि प्रधानमन्त्रीले अढाई वर्षमै निर्वाचन गर्ने हुकुमी शासन गरेको उन आरोप छ । वैशाखमा कुनैपनि हालतमा निर्वाचन नहुने दाबी पनि उनले गरेका छन् ।
कार्यक्रममा बोल्दै बरिष्ठ अधिवक्ता सुनिल पोखरेलले संसदमा कुनैपनि नीति, कार्यक्रम फेल नभएका प्रधानमन्त्रीलाई प्रतिनिधि सभा विघटनको अधिकार नभएको धारणा राखे । प्रतिनिधि सभा पुर्नस्थापना आवश्यक रहेको बताए ।
