अन्तर्राष्ट्रिय अपडेट ।
भारतीय टेलिभिजन जगतमा चर्चित कपिल शर्मा शो बन्द हुने भएको छ । ट्वीटरमा गरिएको प्रश्नोत्तर सेसनमा कपिल शर्मा आफैंले कपिल शर्मा शो बन्द हुन लागेको पुष्टि गरेका छन् ।
कपिल शर्मा र उनकी श्रीमती गिन्नी चतरथ चाँडै नै दोस्रो सन्तानलाई स्वागत गर्ने तयारीमा रहेको जानकारी पनि कपिल आफैंले दिएका छन् ।
ट्वीटरमा थुप्रै प्रशंसकले #AskKapil का बेला हास्यकलाकारलाई विभिन्न प्रश्न सोधेका थिए भने कपिलले यसको जवाफ पनि दिएका थिए । एक प्रशंसकले सोधे, ‘कपिल शर्मा सर, शो अफ एयर किन हुँदैछ ?’ यसको जवाफमा कपिल शर्माले भने, ‘किनभने म दोस्रो सन्तानको आगमनका बेला आफ्नी श्रीमतीसँग हुनुपर्नेछ ।’
केही दिन अघि कपिल शर्माको कमेडी शो बन्द हुन लागेको खबर आएको थियो । यद्यपि, च्यानलको तर्फबाट यसबारे कुनै पुष्टि गरिएको थिएन । कपिल शर्माको शो चाँडै नै बन्द हुने र केही समय पछि यो नयाँ सिजनका साथ आउने जानकारीमा उल्लेख छ ।
उता कपिल शर्मा चाँडै नै नेटफ्लिक्समा देखिने भएका छन् । कपिल शर्मा शोबारे खासै धेरै जानकारी सार्वजनिक भएका त छैनन् । केही समय अघि कपिलले आफ्नो युट्युब च्यानलमा बहाइन्ड द जोक्स विद कपिल नामको सिरिजको सुरुवात गरेका छन् ।