जनादेश, काठमाडौँ ।
सरकारले विप्लव नेतृत्वको नेकपासँग वार्ता गर्न औपचारिक प्रक्रिया अघि बढाएको छ । सरकारले गृहमन्त्री रामबहादुर थापा बादलको नेतृत्वमा वार्ता टोली गठन गरेको छ । प्रधानमन्त्रीका विदेश मामिला सल्लाहकार डा. राजन भट्टराई त्यसको सदस्य छन्।
सरकारका प्रवक्ता पार्वत गुरुङले सञ्चारमन्त्रालयमा पत्रकार सम्मेलन गरी वार्ता टोली गठनको जानकारी दिएका हुन् । उनले चाँडै विप्लव पक्षको वार्ता टोली पनि सार्वजनिक हुने र छलफल अघि बढ्ने बताए ।
केही समय यता वार्ताका लागि औपचारिक र अनौपचारिक पहल हुँदै आएका थिए । प्रधानमन्त्री केपी ओलीले सोमबार पोखराबाट विप्लवलाई वार्तामा आउन आह्वान गरेका थिए ।