जनादेश, काठमाण्डौ । स्वास्थ्य मन्त्रालयले कोभिड संक्रमण बढ्दो अवस्थामा रहेको बताउँदै उच्च सतर्कता अपनाउन अपिल गरेको छ ।
मन्त्रालयले एक अपिल जारी गर्दै विशेष गरी बालबालिका, युवा वर्गमा संक्रमण तथा मृत्यु बढ्दो गतिमा रहेको भन्दै स्कुलसहितका भीडभाड हुने स्थानमा सहभागी नहुन आग्रह गरेको हो । १४ जिल्ला अति प्रभावित भएकाले सचेत रहन मन्त्रालयको अपिल छ ।
मन्त्रालयले अति प्रभावित भनी वर्गीकरण गरेका जिल्लाहरुमा काठमाडौं, ललितपुर, कास्की, रुपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङ छन् । यी जिल्लामा बढी भीडभाड हुने सबै क्षेत्र तथा सेवाहरु अविलम्ब बन्द गर्नुपर्ने अवस्था भए पनि विद्यालय, रात्रि व्यवसायहरु, सात बजेपछि सबै रेष्टुरेन्ट तथा क्लबहरु, खेलकूद, जीम, सार्वजनिक पूजाआजा तथा जात्राहरु, सभा, सम्मेलन, बैठक तथा भेलाहरु, सिनेमा हल, सपिङ मल, नाचघर, पार्टी प्यालेस, हेल्थ क्लब, स्विमिङ पुल आदि स्थलहरुमा सहभागी नहुन मन्त्रालयले आग्रह गरेको छ ।
यसैबीच नेपालमा २४ घन्टामा नेपालमा थप ४ सय ९० जनामा कोरोना भाइरसको संक्रमण पुष्टि भएको छ । ४ हजार १ सय ५२ नमुना परीक्षण गर्दा सो संख्यामा कोरोना पुष्टि भएको मन्त्रालयले जानकारी दिएको हो । यो संगै कुल संक्रमीतको संख्या २ लाख ८२ हजार ५४ जना पुगेको छ जसमध्य ४ हजार ३ सय ८४ जना सक्रीय संक्रमीत रहेका छन् । आज काठमाडौँ उपत्यकामा मात्र १ सय ९६ जना संक्रमित थपिएका छन् ।
विभिन्न जिल्लामा गरेर थप ५ जना कोरोना संक्रमणका कारण ज्यान घुमाएका छन् । योसंगै हालसम्म ३ हजार ६६ जनाको मृत्यु भएको छ ।