एजेन्सी । कोरोना भाइरस संक्रमणका कारण यस सिजनमा असर पर्दा प्रिमियर लिगको नयाँ सिजन २०२०/२१ सेप्टेम्बर १२ मा सुरु हुने भएको छ । सिजनको अन्तिम खेल भने मे २३ मा हुनेछ ।
जारी सिजनको अन्त्य भने आइतबार हुँदैछ । लिभरपुलले ३० वर्षपछि लिग उपाधि जित्दा अन्य स्थानको टुंगो लाग्न भने बाँकी रहेको छ । उपविजेता म्यानचेस्टर सिटी अर्को सिजन च्याम्पियन्स लिग खेल्ने पक्का हुँदा चेल्सी, म्यानचेस्टर युनाइटेड र लेस्टर सिटीमध्य दुई टोलीले शीर्ष ४ मा स्थान पक्का गर्नेछन् ।
अंक तालिकाको पुछारमा रहेको नर्विच रेलिगेसनमा पर्ने पक्का भइसकेको छ । बर्नमाउथको पनि गणितीय सम्भावना मात्र बाँकी रहँदा एस्टन भिल्ला र वाटफर्डमध्य एक टोली दोस्रो श्रेणीमा घटुवा हुनेछ ।
कोरोना भाइरस कोभिड १९ का कारण प्रिमियर लिगसहित युरोपका सबै फुटबल गतिविधि स्थगित भएका थिए । लिग वान बाहेक युरोपका शीर्ष ४ लिग भने कोभिग १९ को संक्रमण फैलिरहँदा पनि सञ्चालन भएको थियो । यद्दपी लिग भने विना दर्शक सञ्चालन भएका छन् ।
फुटबल संघ र इंग्लिस फुटबल लिगसँगको घरेलु फुटबलका अन्य प्रतिस्पर्धाका विषयमा लगातार छलफलपछि प्रिमियर लिगको मिति तय गरिएको हो । युरोपेली प्रतियोगिताको हकमा भने अर्को सिजनबारे अझै यकिन निर्णय हुन सकेको छैन । अर्को सिजन प्रिमियर लिगमा लिड्स युनाइटेड र वेस्ट ब्रोम आउने पक्का भइसकेको छ ।
