जनादेश, काठमाण्डौं । राष्ट्रिय परीक्षा बोर्डले वार्षिक परीक्षामा सोधिने प्रश्न कम्तिमा पाँच वर्षसम्म दोहोर्याउन नहुने गरी स्तरीकृत परीक्षा प्रणाली लागू गरेको छ । यो कदमले बजारमा उपलब्ध पुराना प्रश्नपत्रहरू स्मरण गर्ने र अभ्यास गर्ने अभ्यासलाई हटाउने लक्ष्य राखेको राष्ट्रिय परीक्षा बोर्डले जनाएको छ।
परीक्षाको तयारीका लागि बजारमा उपलब्ध गाईडबुक, गपशपका पत्र, ‘पुरानो सुन’ र बजारमा पाइने अन्य सामग्रीमा भरपर्ने विद्यार्थीहरुका लागि अब पढाइमा मिहिनेत गर्नु पर्ने भएको छ ।
बोर्डका अध्यक्ष डा. महाश्रम शर्माले स्मरणमा भर पर्ने परम्परागत पद्धतिको अन्त्य गर्नुपर्ने बताएका छन । उनले भने, पहिलेको परीक्षामा सोधिएका प्रश्न कम्तिमा पाँच वर्ष दोहोरिने छैन, घोकर कण्ठ गरेर उत्तर दिने युग समाप्त भएको छ।
यस वर्षदेखि कक्षा १० (एसईई)का लागि गणित, विज्ञान र अंग्रेजी विषयको स्तरीकृत परीक्षा प्रणाली लागु भएको छ भने आगामी वर्ष अन्य कक्षामा पनि विस्तार गर्ने योजना छ । बोर्डले प्रणालीको प्रभावकारिता सुनिश्चित गर्न देशव्यापी सयौं शिक्षकहरूद्वारा विकसित हजारौं प्रश्नपत्र सेटहरू तयार पारेको छ। सीमित पहुँच सुनिश्चित गरी गोपनियता कायम राख्दै नगरपालिका तहदेखि बोर्डमा प्रश्नपत्र वितरण गरिनेछ ।
स्तरीकृत परीक्षा प्रणालीको कार्यान्वयनले विद्यार्थीहरूलाई नियमित कक्षाकोठा सिकाइको माध्यमबाट उनीहरूको रचनात्मक क्षमतालाई पोषण दिनुको सट्टा परीक्षा पास गर्नमा मात्र केन्द्रित हुने समस्यालाई हल गर्नेछ । यस प्रणालीले विद्यार्थीहरूलाई आफ्नो शैक्षिक यात्रामा सिकेका कुराहरू बुझ्न र लागू गर्न प्रोत्साहित गर्ने अध्यक्ष डा.शर्मा विश्वास गर्छन्।
डा शर्माले पढाइका लागि पाठ्यपुस्तकमा मात्र भर नभई पाठ्यक्रम पालना गर्ने शिक्षकको महत्त्वमा जोड दिए ।
यस प्रक्रियामा बोर्डले सजिलो, मध्यम र कठिन गरी तीन वर्गीकरण प्रश्नपत्र तयार गरेको छ।
