जनादेश, काठमाण्डौ । त्रिभुवन अन्तर्राष्ट्रिय विमानस्थलमा अवतरणका लागि मौसमअनुकूल नभएपछि शुक्रबार चारवटा अन्तर्राष्ट्रिय उडान भारततर्फ डाइभर्ट भएका छन् ।
विमानस्थलका महाप्रबन्धक प्रतापबाबु तिवारीका अनुसार दमामबाट आउँदै गरेको हिमालय एयरलाइन्सको विमान र दिल्लीबाट आउँदै गरेको एयर इन्डियाको विमान बनारस फर्किएका छन् । त्यस्तै दोहाबाट आउँदै गरेको कतार एयरवेजको विमान कोलकाता र दिल्लीबाट आउँदै गरेको नेपाल वायुसेवा निगमको विमान उतै फर्किए ।
तिवारीका अनुसार एयर इन्डियाको विमानले दोस्रोपटक काठमाडौं अवतरणका लागि प्रयास गरेको थियो तर सफल हुन नसकेपछि दिल्ली नै फर्किएको थियो ।
आन्तरिक उडानतर्फ शुक्रबार बुद्ध एयरका ६ वटा उडान र यती एयरलाइन्सको एउटा उडान काठमाडौंमा अवतरण हुन नसकेर डाइभर्ट भएका थिए । विमानस्थलमा दिउँसो ४ हजार मिटर भएको भिजिबिलिटी साँझ ६ हजार मिटर भएको थियो ।
खराब मौसमका कारण २५ वटा आन्तरिक उडान रद्द भए । आन्तरिक उडानमा रहेका वायुसेवाहरूले शुक्रबारका लागि १ सय १७ वटा उडान तालिका बनाएका थिए तर बेलुकीसम्म ९२ वटामात्रै हुन सकेको विमानस्थल कार्यालयले जनाएको छ ।
