जनादेश हेल्थडेस्क ।
कोरोनाका कारण नेपालमा मंगलबार हालसम्मकै बढी संक्रमण र मृत्यु भएको छ । १६ हजार १ सय ३१ जनाको पीसीआर परीक्षण गर्दा ७ हजार ५ सय ८७ जना (४७.०३ प्रतिशत) मा संक्रमण पाइएको छ भने एकै दिन ५५ जनाको मृत्यु भएको छ ।
लगातार तेस्रो दिन ७ हजार जनाभन्दा बढीमा संक्रमण पुष्टि भएको हो । स्वास्थ्य तथा जनसंख्या मन्त्रालयका अनुसार सोमबार ७ हजार ४ सय ४८ र आइतबार ७ हजार २ सय ११ जनामा संक्रमण पुष्टि भएको थियो ।
यस्तो अवस्थामा कसरी बँच्ने त ?
कोरोना संक्रमण भयावह भइरहेका बेला यसबाट बच्ने उपायबारे विज्ञहरूले निरन्तर सल्लाह/सुझाव दिइरहेका छन्। जनस्वास्थ्यविद् डा. रवीन्द्र पाण्डेले कोरोनाबाट बच्ने र बचाउने उपायबारे ८ टिप्स दिएका छन् । यस्ता छन् उनका टिप्सः
अहिले महामारी निकै बढेको छ। यस्तो प्रतिकूल अवस्थामा हामी सकभर घरभित्र बसौं। केही दिन वा हप्ता हामीले धैर्यता एवं आत्मानुशासन पालना गर्यौं भने आफू, आफ्नो परिवार र समुदायलाई बचाउन सक्छौं।
१- भेटघाट, भोजभतेर, घुमफिर, पेसागत काम, अध्ययन आदि गर्न पनि हामीले स्वास्थ्य रक्षा गर्नुपर्छ। महामारी नियन्त्रण भएपछि हामीले स्वतन्त्र जीवनमा रमाउन पाउनेछौं।
२- यसै पनि कोरोना संक्रमणको मृत्युदर नेपालमा १ प्रतिशत मात्र छ। अहिले पनि ९० प्रतिशत संक्रमित घरमै सामान्य उपचारले निको हुनुभएको छ। पोषिलो खाना, व्यायाम, तनाव व्यवस्थापन, सकारात्मक सोच आदिबाट हाम्रो रोगसँग लड्ने क्षमता बढ्छ।
३-भारतमा देखिएको अक्सिजनको हाहाकार, मृतकको संख्या, अस्पताल तथा घाटको अवस्था देखेर हामी आत्तिनुपर्ने अवस्था हुँदैन। नेपालका अस्पताल संक्रमितले भरिए पनि निको हुने क्रम बढिरहेको छ। पुराना निको हुने तथा नयाँले त्यो ठाउँ पाउने क्रम चलिरहेको छ।
४- त्यस्तै गाह्रो भएमा कोभिड अस्पतालका फिभर क्लिनिकमा गएर छातीको एक्सरेलगायतका परीक्षण गर्न सकिन्छ। सामान्य अवस्था भएमा घरमै बसेर चिकित्सकको सल्लाहअनुसार उपचार गर्न सकिन्छ भने गम्भीर अवस्था भए अस्पतालमा व्यवस्थापन हुन्छ।
५- समाचारको आतंकले गर्दा मनमा कोरोना बोकेर आत्तिन हुँदैन।
६- अत्यावश्यक कामले घरबाहिर निस्किनुपरेमा डबल मास्क लगाउने, भौतिक दूरी कायम राख्ने, भीडभाडमा नजाने तथा हातको निरन्तर सफाइ गर्नाले हामी संक्रमणबाट बच्न सक्छौं।
७- उपचारभन्दा रोकथाम सजिलो र सस्तो छ। नाकमुनि वा चिउँडोमा मास्क लगाएका व्यक्तिलाई हामीले नागरिक तहबाट पनि सम्झाउन सक्छौं।
८- व्यक्ति-व्यक्तिमा रोकथामको प्रयास हुने हो भने संक्रमण घट्दै जान्छ। परिस्थति जतिसुकै प्रतिकूल भए पनि मनस्थिति बलियो भयो भने हामी कोरोना भाइरसँग लड्न सक्छौं।
