भारतविरुद्धको फाइनलमा आफूलाई रोक लगाईएपछि नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले दक्षिण एसियाली फुटबल फेडेरेसन साफको आलोचना गरेका छन् ।
साफ च्याम्पियनसिप २०२१ को फाइनलमा साफले उनलाई टेक्निकल एरियामा प्रवेश गर्न रोक लगाउने निर्णय गरेपछि अलमुताइरी अक्रोशित देखिए । प्रतिबन्धपछि अलमुताइरीले बेन्च र टोलीको ड्रेसिङ रुममा जान पाउने छैनन् ।
प्रतियोगिताको लिग चरणका खेलका क्रममा अलमुताइरीले दुई फरक खेलमा पहेंलो कार्ड पाएका थिए । त्यसकै आधारमा साफले उनलाई फाइनलमा टेक्निकल एरिया प्रवेश गर्न नदिने भनेको छ । यो बिषयमा साफले शुक्रबार नेपाल टिमलाई पत्र पठाएको थियो ।
अलमुताइरीको प्रतिबन्धका बिषयमा अखिल नेपाल फुटबल संघ एन्फाले साफलाई पत्राचार समेत गरिसकेको जनाएको छ । एन्फाका अनुसार साफले आफ्नै नियमावली अनुसार पनि अलमुताइरीलाई प्रतिवन्ध लगाउन पाउँदैन । एएफसीको अनुशासन नियमावलीमा प्रतियोगिताका दौरान दुई खेलमा पहेंलो कार्ड पाउँदा अर्को खेल गुमाउने उल्लेख भए पनि साफको नियमावलीमा भने त्यो छैन । अलमुताइरीले लिग चरणमा श्रीलंका र अन्तिम खेलमा बंगलादेशविरुद्ध पहेंलो कार्ड पाएका थिए ।
अलमुताइरीले टेक्निकल एरिया गुमाएपछि अब नेपाली एरियामा सहायक प्रशिक्षक किरण श्रेष्ठ हुनेछन् ।
यस्तै नेपालका फरवार्ड अन्जन विष्टले समेत आजको खेल गुमाउनेछन् । उनले दोहोरो पहेंलो कार्डका कारण फाइनल गुमाउने भएका छन् । भारतका प्रशिक्षक इगोर स्टिमाचलाई पनि साफले प्रतिबन्ध लगाएको छ । उनले अन्तिम खेलमा दुई पहेंलो अर्थात एक रातोकार्ड बराबर मानिने सजाय सामना गरेका थिए ।
