चन्द्रप्रकाश नेपाली,
घोराही । नेपाल कम्युनिष्ट पार्टी (नेकपा)का केन्द्रीय सदस्य एवं राष्ट्रियसभा सदस्य जगप्रसाद शर्माले कुनै पनि हालतमा पार्टी विभाजन नहुने बताउनुभएको छ ।
१८ बर्षअघि आजकै दिन तत्कालीन शाही सेनाद्वारा सामूहिकरुपमा १२ जना दलितहरुको हत्या भएको दिनको सम्झनामा दंगीशरण २ गोल्टाकुरीमा सहिद परिवारले आयोजना गरेको स्मृति सभालाई सम्वोधन गर्दै उहाँले यस्तो धारणा राख्नुभएको हो ।
सहिद तथा बेपत्ता परिवारका केही गुनासा र समस्या रहेको स्वीकार गर्दै उहाँले आजको परिवर्तनको पहिलो हकवाला नै सहिद बेपत्ता परिवार र घाइते अपांगहरु भएकाले उनीहरुको ब्यवस्थापन राज्यसत्ताको दायित्व भएको बताउनुभयो ।
नेकपा दाङका अध्यक्ष टीकाराम खड्काले सहिदहरु यो परिवर्तनका सम्पत्ति भएकाले सहिद तथा बेपत्ता परिवारकै सुझावअनुसार पार्टी अघि बढ्ने बताउनुभयो ।
कम्युनिष्ट आन्दोलन र विकास निर्माण, जीविकालगायत हरेक क्षेत्रमा सहिद परिवारलाई समावेश गरेर लगिने पनि उहाँले बताउनुभयो ।
