जनादेश, काठमाडौँ । नेकपा माओवादी केन्द्रको पूर्व स्थायी कमिटी सदस्यहरुको बैठकले कोरोनाको महामारी कम नभएसम्म जनपरिचालनका कामहरुको जिम्मा पार्टी अध्यक्षलाई दिने निर्णय गरेको छ ।
पार्टी मुख्यालय पेरिसडाँडामा बसेको पूर्व स्थायी कमिटी सदस्यहरुको बैठकले अध्यक्ष पुष्पकमल दाहाल प्रचण्डलाई एकल अधिकार दिने निर्णाय गरेको हो । बाँकी रहेका संगठनात्मक कामहरु टुंगो लगाउने जिम्मेवारी समेत अध्यक्ष दाहाललाई दिने निर्णय भएको नेता कृष्णबहादुर महराले जानकारी दिए ।
बैठकले एमसिसिको विषय समाधान गर्न पार्टीले कार्यदल समेत बनाएको छ ।
कार्यदलले दिने सुझावको आधारमा एमसिसिको सन्दर्भमा पार्टीको थप धारणा बनाउने निर्णाय भएको महराको भनाई छ । बैठकमा तीनै तहको निर्वाचन एकैपटक गर्न सकिने विषयमा समेत छलफल भएको छ ।