जनादेश वाच।
नाबालिग बलात्कार प्रकरणमा पुर्पक्षका लागि थुनामा रहेका नेपाली क्रिकेट टिमका पूर्वकप्तान सन्दीप लामिछानेलाई उच्च अदालतले थुनामुक्त गर्न आदेश दिएको छ । उच्च अदालत पाटनले बिहीबार उनलाई २० लाख रुपैयाँ धरौटीमा थुनामुक्त गर्न आदेश दिएको हो । उच्चले जिल्लाको आदेश उल्ट्याउँदै धरौटीमा छाड्न आदेश दिएको हो ।
उच्च अदालतका न्यायाधीश ध्रुवराज नन्द र रमेश ढकालको संयुक्त इजलासले उनलाई धराैटीमा रिहा गर्न आदेश दिएकाे हाे ।
जिल्ला अदालतले पुर्पक्षका लागि थुनामा राख्ने आदेश दिएपछि उनी उच्च अदालत पुगेका थिए । उच्चले थुनामुक्त गर्न आदेश दिए पनि विदेश भ्रमणमा भने राेक लगाएकाे छ । जिल्ला अदालतमा विचाराधीन रहेकाे बलात्कार मुद्दा अब उनले जेल बाहिरै रहेर लड्ने छन् ।
उच्चले दिएको आदेशमा उनीमाथि क्रिकेट खेल्न प्रतिबन्ध लगाएको छैन । जसका कारण अब उनी मैदानमा देखिन सक्छन् । कप्तान रहेकै अवस्थामा उनी बलात्कार आरोपमा पक्राउ परेका थिए । त्यसपछि मात्र नेपाल क्रिकेट संघले उनलाई कप्तानबाट हटाएको थियो ।
अदालतले उनलाई थुनामुक्त गरे पनि विदेश भ्रमणमा प्रतिबन्ध लगाएको छ भने काठमाडौं उपत्यका छोड्दा पनि अनुमति लिनुपर्ने सर्त राखेको छ । काठमाडौं छोड्दा काठमाडौं प्रहरी परिसरमा उनले उपत्यका छोड्नुको कारण र फर्किने मितिसमेत लिखित रूपमा जानकारी गराउनुपर्ने हुन्छ ।