एजेन्सी ।
कोरोना महामारी पछि भर्चुअल मिटिङ तथा कन्फरेन्स र वेविनारहरु लोकप्रिय विकल्प बनेका छन् । जुम र गुगल मिट लगायतका प्लेटफर्मको उच्च प्रयोग भैरहेको छ ।
यसैबीच गुगलले ल्याएको गुगल मिट सेवा अब निःशुल्क नहुने भएको छ । एक घण्टा मात्रै निःशुल्क प्रयोग गर्न पाइने र त्यसपछि शुल्क तिर्नुपर्ने नियम गुगलले ल्याएको छ ।
अनलाइनमार्फत् भिडियो बैठक तथा कुराकानी गर्न मिल्नेगरी गुगलले गुगल मिट सेवा सुरु गरेको थियो । अहिलेसम्म निःशुल्क रहेको यो सेवा सेप्टेम्बर ३० देखि एक पटकमा बढीमा ६० मिनेट मात्रै निःशुल्क प्रयोग गर्न पाइने र त्यसभन्दा बढी प्रयोग गरे शुल्क तिर्नुपर्ने भएको छ ।
गुगल मिटको अन्य सेवा तथा कार्यप्रणालीमा कुनै परिवर्तन भने नगरिएको तर निःशुल्क अवधि घटाइएको गुगलले जनाएको छ । यो एपमा २५० जनाभन्दा बढी सहभागी एकैपटक राखेर बैठक गर्न सकिन्छ ।
एउटै डोमेनबाट एक लाखभन्दा बढीले हेर्न मिल्नेगरी प्रत्यक्ष प्रसारण गर्न मिल्ने र गुगल ड्राइभमा रेकर्ड गर्न पनि मिल्ने सेवा दिइने तर उपभोक्ताहरूले मासिक २५ डलर मात्रै तिर्नुपर्ने गुगलद्वारा जारी वक्तव्यमा उल्लेख गरिएको छ ।
यो पनि हेर्नुस्- कोरोना महामारीले मालामाल भएको एक कम्पनी र त्यसका मालिकको रोचक कथा
