जनादेश वाच।
सत्ताधारी दलका नेताहरूले नै संशोधन नभए बजेट पारित हुन नदिने चेतावनी दिइरहेका बेला आगामी आइतबार (१७ असार) बजेट पास गर्नेगरी सरकार अघि बढेकाे छ । बुधबारसम्म बजेटबारे मन्त्रालयगत छलफल र मन्त्रीहरूकाे जवाफ दिने कार्य सकेर १७ असारमा बजेट पारित गर्नेगरी सरकार अघि बढेकाे हाे ।
साझेदार दलहरूबीच देखिएका असमझदारीहरूलाई समयक्रममा सम्बाेधन गर्नेगरी हाललाई बजेट जस्ताकाे त्यस्तै पारित गर्ने तयारी भइरहेकाे स्राेतकाे भनाइ छ । ‘संशाेधन हुँदैन । अहिलेलाई बजेट पारित हुन्छ । असमझदारीहरू बिस्तारै हल हुँदै जान्छन्’, स्राेतले भन्याे ।
कतिपय सत्तारुढ सांसदहरूले नै बजेट संशोधन गर्नै हुन्न भन्ने परम्परागत मान्यताबाट माथि उठेर असन्तुष्टिहरू हल गर्न सुझाव दिए पनि सरकार त्यसमा तयार नदेखिएकाे हाे ।
खासगरी सरकारमा रहेका एकीकृत समाजवादी र जसपाले बजेट संशोधन नभए विपक्षमा मतदान गर्ने चेतावनी दिइसकेका छन् । कतिपयले बजेटकै कारण देखिएकाे खटपटले सत्तासमीकरण नै फेरिन सक्ने अनुमान पनि गरेका छन् । प्रमुख विपक्षी एमालेले बजेट फेल गरेर सरकार ढाल्ने कसरत गरिरहेकाे उनीहरूकाे भनाइ छ ।
