एजेन्सी ।
इंग्लिस क्लब म्यानचेस्टर युनाइटेडले नेदरल्यान्ड्सको आयाक्स एम्स्टरड्यामबाट मिडफिल्डर डोनी भान डे बिकलाई अनुबन्ध गरेको छ ।
युनाइटेडले ३५ मिलियन पाउण्ड खर्चंदै ५ मिलियन सम्भावित बोनससहित आयाक्सबाट मिडफिल्डरलाई भित्र्याएको हो । डोनीले युनाइटेडसँग ५ वर्षका लागि अनुबन्धन गरेका छन् । २३ वर्षीय मिडफिल्डर नेदरल्यान्ड्सको राष्ट्रिय टोलीमा समेत नियमित रहँदै आएका छन् । उनी आयाक्सकै युवा एकेडेमीबाट आएका हुन् ।
सन् २०१८-१९ मा आयाक्सलाई सेमिफाइनलसम्म डोर्याउँदा डोनीको प्रदर्शन उत्कृष्ट रहेको थियो । उनलाई युनाइटेडले त्यसै सिजनपछि अनुबन्ध गर्ने खोजेको थियो । तर अर्का मिडफिल्डर फ्रांकी डे जोङ बार्सिलोना गएपछि आयाक्सले दुवैलाई एकै सिजनमा छोड्न मानेको थिएन । युनाइटेडले डोनीको अनुबन्धसंगै मिडफिल्ड झनै बलियो बनाएको छ ।
डोनीले आयाक्सको सिनियर टोलीबाट १ सय ७५ खेल खेल्दै ४१ गोल गरेका छन् । उनले युनाइटेडबाट प्रिमियर लिगको पहिलो खेलका लागि नै छनोट हुन योग्य भएका छन् । युनाइटेडले यस सिजनको ट्रान्सफर विन्डोमा पहिलो खेलाडीको रुपमा डोनीलाई अनुबन्ध गरेको हो । यसअघि क्लबले गोलरक्षक डिन हेन्डरसनको सम्झौता नविकरण गरेको थियो ।
