एजेन्सी ।
रुसले विकास गरेको कोरोनाविरुद्धको खोपले सकारात्मक नतिजा दिएको छ । ३८ जना स्वस्थ मानिससहित ४२ दिनसम्म गरिएको ट्रायलमा नतिजा राम्रो देखिएको मेडिकल जर्नल द लान्सेटले जनाएको छ ।
तर खोपलाई पूर्णरुपमा सफल र सुरक्षित मान्नका लागि अझ दीर्घकालीन परीक्षण आवश्यक रहेको उक्त जर्नलमा उल्लेख छ ।
रुसले बनाएको स्पुतनिक-फाइभ नामक खोप कोरोनाविरुद्ध विश्वमा बनेको पहिलो यस प्रकारको खोप हो । यद्यपि विश्व स्वास्थ्य संगठनले मान्यता दिइनसकेको यो खोपलाई अन्तर्राष्ट्रिय समुदायले पनि स्वीकार गरिसकेको छैन् ।
शुक्रबारमात्र विश्व स्वास्थ्य संगठनका प्रमुख बैज्ञानिक डाक्टर सौम्य स्वामिनाथनले कोरोनाविरुद्धको खोप २ हजार २१ को मध्यसम्म उपलब्ध हुने बताएका छन् ।
यसअघि रुसले नेपालमा खोप परीक्षणको चाहाना राखेको समाचार सार्वजनिक भएको थियो । खोप नेपालमा तेस्रो चरणको परीक्षण गर्ने प्रस्ताव रुसी राजदूतले राखेको नेपाल स्वास्थ्य अनुसन्धान परिषदले पुष्टि गरेको छ ।
