एजेन्सी ।
युरोपियन क्लब फुटबलको नयाँ सिजन २०२०/२१ सुरु भइसकेको छ । यसैबीच यूईएफएले पनि च्याम्पियन लिग, युरोपा लिग र अवार्डको मिति सार्वजनिक गरेको छ ।
अक्टुबर १ र २ मा नयाँ सिजनको च्याम्पियन्स लिग र युरोपा लिगको खेल तालिका सार्वजनिक हुने भएको छ । यसअघि ग्रिसको एथेन्समा समूह चरणको खेल तालिका र अवार्ड कार्यक्रम गर्ने भनिए अब स्विटजरल्यान्डको नियोनस्थित युइएफएकै मुख्यालयमा हुने भएको छ ।
एक दिनको फरकमा च्याम्पियन्स लिग र युरोपा लिगको समूह चरणको खेलतालिका सार्वजनिक गर्नुका सार्थ २०१९/२० का उत्कृष्ट खेलाडी र प्रशिक्षकको अवार्ड पनि प्रदान गरिएको छ । विश्वव्यापी रुपमा कोभिड १९ को महामारी यथावत रहेकोले जनस्थास्थलाई ध्यानमा राख्दै कार्यक्रम एथेन्समा नगर्ने विषयमा ग्रिसका अधिकारी सहमत भएको युइएएफलेले जनाएको छ ।
ठूलो संख्यामा अतिथि र प्रतिनिधि एकै ठाँउ जम्मा हुने अवस्था अझै नरहेका कारण कार्यक्रम बन्द कोठामा सिमित व्यक्तिहरुको उपस्थितिमा हुने भएको छ । खेल तालिका र अवार्डको प्रत्यक्ष प्रसारण गरिनेछ । कार्यक्रममा अवार्ड विजेताहरुको उपस्थिति रहने तर विगतझैं सबै क्लबका प्रतिनिधि र सञ्चारमाध्यमका प्रतिनिधि भने रहने छैनन् ।
खेल तालिका च्याम्पियन्स लिगको अक्टुबर १ र युरोपा लिगको अक्टुबर २ मा हुनेछ । ग्रिस अधिकारीलाई धन्यवाद दिदै यूईएफले भविष्यमा त्यस्तै कार्यक्रम आयोजना गर्ने वचन दिएको छ ।
