एजेन्सी ।
फ्रेन्च फरवार्ड करिम बेन्जेमाको चार गोल सहयोगमा स्पेनिस महारथी रियाल म्याड्रिडले नयाँ सिजनको लागि प्रि– सिजनको अन्तिम तयारी खेलमा गेटाफेमाथि सानदार जित निकालेको छ ।
मंगलबार राति रियलको घरेलु मैदान अल्फ्रेडो डि स्टेफानोमा भएको खेलमा रियलले ला लिगा प्रतिद्धन्द्धी गेटाफेमाथि ६–० को फराकिलो जित हात पारेको हो । रियलको फराकिलो जितमा बेन्जेमाले चार गोल गर्दा कप्तान सर्जियो रामोस र युथ टोलीका सर्जियो एरिबासले समान एक गोल गरे । सबै ६ गोल पहिलो हाफमा सम्भव भएको थियो ।
रियलले गेटाफेविरुद्ध पहिलो हाफमा थिवाउट कोर्टुवा, ड्यानी कार्भाजल, इडर मिलिटाओ, सर्जियो रामोस, मार्सेलो, लुका मोड्रिच, क्यासमिरो, सर्जियो एरिबास, मार्भिन पार्क, करिम बेन्जेमा र भिनिसिय जुनियरलाई खेलाएको थियो ।
दोस्रो हाफमा एन्ड्री लुनिन, अल्भारो ओर्डिजोला, नाचो फर्नान्डेज, राफयल भरान, फर्लान्ड मेन्डी, फेड भाल्भेर्डे, एन्टेनियो ब्लान्को, टोनी क्रुस, रोड्रिगो, बोर्जा मायोरल र मिगुइल गुइटिरेजलाई मौका दिएका थिए । गेटाफेले पनि ‘बी’ टोलीका केही खेलाडीलाई मौका दिएको थियो ।
खेल बन्द रंगशालामा भएको थियो । त्यहाँ प्रेस र टिभी क्यामरालाई समेत प्रवेश दिइएको थिएन । नयाँ सिजनअघि रियल र गेटाफेको यो पहिलो र अन्तिम तयारी खेल हो ।
गेटाफेले शुक्रबार राति घरेलु मैदानमा ओसासुनासँग खेल्दै नयाँ सिजनको ला लिगाको सुरुवात गर्दैछ । यस्तै रियल म्याड्रिडले आइतबार राति रियल सोसिडाडसँग उसकै मैदानमा खेल्दै ला लिगाको सुरुवात गर्नेछ ।
