राष्ट्रपति डोनाल्ड ट्रम्पले आयकर छली गरेको दाबीसहितको खबर न्यूयोर्क टाइम्समा प्रकाशित भएपछि सो विषय राष्ट्रपति ट्रम्पका लागि चुनावी मुखमा गलपासो बनेको छ ।
ट्रम्पले आफूमाथिको अभियोग ‘फेक न्यूज’ भनि खारेज गरेका छन् ।
न्यूयोर्क टाइम्सल झण्डै दुई दशकको कर सम्बन्धी विवरण प्राप्त गरेको र त्यसमा ट्रम्प तथा उनको कम्पनीले ठूलो कर लगभग तिर्दै नतिरेको देखिएको दाबीसहित खबर प्रकाशित गरेको छ ।
समाचार अनुसार ट्रम्पले सन् २०१६ र २०१७ मा आयकर बापत मात्रै ७५० डलर तिरेका थिए ।
अमेरिकी तल्लो सदन हाउस अफ रिप्रिजेनटेटिभकी सभामुख तथा शीर्ष डेमोक्र्याट न्यान्सी पेलोसीले ट्रम्पले आयकर छली गरेको आरोपित विषय ‘राष्ट्रिय सुरक्षा’ को प्रश्न रहेको बताएकी छन् ।
खबर प्रकाशित भएपछि पेलोसीले ट्रम्पले विदेशी स्वार्थसहितको रकम लिए–नलिएको स्पष्ट हुनु पर्ने बताएकी छन् । यदी दिएको भए त्यो राष्ट्रिय सुरक्षाका लागि अति खतराको विषय रहेको उनले बताएकी हुन् ।
पेलोसीले भनेकी छन्, ‘प्रकाशित खबर अनुसार यी राष्ट्रपतिको ४०० मिलियन डलर ऋण छ । त्यो ऋण कोबाट लिएको? विभिन्न देशबाट? ऋण बापत उनीहरु के लाभ चाहन्छन्? त्यसकारण मेरा लागि यो राष्ट्रिय सुरक्षाको विषय हो र यसले गम्भीर प्रश्न खडा गरेको छ ।’
ट्रम्प र उनको कम्पनीको कर सम्बन्धी पछिल्लो दुई दशकको जानकारी आफूले प्राप्त गरेको न्यूर्योक टाइम्सले बताएको छ ।
सो तथ्यांक अनुसार ट्रम्पले पछिल्लो १५ वर्ष मध्ये १० वर्ष आय कर नै नतिरेको देखिएको पत्रिकाले जनाएको छ । ट्रम्पको कम्पनीले नोक्सान भएको रिपोर्ट बनाएर कर छली गरेको देखिएको खबरमा दाबी गरिएको छ ।
यो पनि हेर्नुस् –
