लन्डन । भर्जिल भान डाइकले गरेको अविश्वसनीय गल्तीमा लिभरपुल बुधबार आर्सनलको हातबाट २–१ ले पराजित भएको छ । आर्सनलले एक गोलले पछाडि रहेको स्थिति उल्टाएर जित निकालेको हो ।
![](https://assets-cdn-api.kantipurdaily.com/thumb.php?src=https://assets-cdn-usa.kantipurdaily.com/uploads/source/news/kantipur/2020/third-party/liverpool-fc-1672020032347.jpg&w=1000&h=0)
यो नतिजापछि यसअघि नै लिग जितिसकेको लिभरपुलले इंग्लिस प्रिमियर लिगमा कीर्तिमानी सय अंक छुने नसक्ने भएको छ । लिभरपुलले ३६ खेलबाट ९३ अंक बनाएको छ । बाँकी दुई खेल जिते लिभरपुलले ९९ अंक मात्रै बनाउनेछ । योर्गन क्लोपको लिभरपुलको यो लिगमा सिजनको तेस्रो हार मात्रै हो ।
दर्शकविहीन इमिरेट्समा लिभरपुलले साडियो मानेको गोलले अग्रता लिएको थियो । भान डाइकको गलत पासमा एलेकजान्डर लेकाजेटले बराबरी गोल गरे । लिभरपुल गोलरक्षक एलिसन बेकरको अर्को भूलमा रेस नेल्सनले विजयी गोल गरे ।
बुधबारको अर्को खेलमा टोटनहमले न्युकासल युनाइटेडलाई ३–१ ले हरायो र त्यसमा ह्यारी केनले दुई गोल गरे । यससँगै क्लब फुटबलमा उनको गोल संख्या दुई सय नाघेको छ ।
उनका २ सय १ गोलमध्ये टोटनहमका लागि १ सय ८५ रहेको छ । अर्को खेलमा म्यानचेस्टर सिटीले बर्नमाउथलाई २–१ ले पराजित गर्यो भने बर्नली र उल्भ्सले १–१ को बराबरी खेले ।