इन्डियन प्रिमियर लिग आईपीएल क्रिकेटमा आज अंक तालिकामा शीर्ष दुई स्थानमा रहेका मुम्बई इन्डियन्स र दिल्ली क्यापिटल्सबीच प्रतिस्पर्धा हुँदै छ ।
यूएईस्थित शेख जायद रंगशालामा राति पौने ८ बजे हुने खेलमा नेपाली लेग स्पिनर सन्दीप लामिछाने आबद्द दिल्ली र मुम्बई आफ्नो सातौं खेलका लागि मैदानमा उत्रनेभएका हुन् । अघिल्ला ६ खेलमा ५ जितसहित १० अंक जोडेको दिल्ली छैटौं जितको खोजीमा हुनेछ ।
श्रेयस एयरको कप्तानीमा मैदान उत्रने दिल्ली मुम्बईलाई हराएर शीर्ष स्थानमा कायम राख्न चाहन्छ । तर, यस सिजन सन्दीपले दिल्लीबाट खेल्ने मौका पाएका छैनन् । दिल्लीले सन्दीपलाई अघिल्ला ६ खेलमा बेञ्चमा राखेको थियो । बलियो टिम मुम्बईविरुद्धसमेत सन्दीपले मौका पाउने सम्भावना निकै कम रहेको छ ।
उता, ६ खेलमा ८ अंक जोडेर दोस्रो स्थानमा रहेको रोहित शर्मा कप्तानीको मुम्बई पाँचौ जितको खोजीमा हुनेछ । दिल्लीलाई हराएर मुम्बई शीर्षस्थानमा उक्लन चाहन्छ । हिजो भएको खेलमा रोयल च्यालेन्जर्स बैंगलोरले चेन्नई सुपर किङ्सलाई ३७ रनले हराउँदै चौंथो जित निकालेको छ । दुबई अन्तराष्ट्रिय क्रिकेट स्टेडियममा बैंगलोरले दिएको १ सय ७० रनको लक्ष्यसहित जवाफी ब्याटिङ गरेको चेन्नईले २० ओभरमा ८ विकेट गुमाएर १ सय ३२ रन मात्र बनाउन सक्यो ।
हैदरावाद तालिकाको पाँचौ स्थानमा छ भने राजस्थान अन्तिमबाट दोस्रो स्थानमा छ । समान ६ खेल खेलेको हैदरावादको ६ अंक छ भने राजस्थानको ४ अंक छ ।
