एजेन्सी ।
औषधि निर्माता कम्पनी जोन्सन एन्ड जोन्सनले कोरोना भाइरसविरुद्धको खोप परीक्षण स्थगित गरेको छ । परीक्षणमा सहभागी एक जना बिरामी भएपछि तत्कालका लागि परीक्षण रोकिएको कम्पनीले जानकारी दिएको हो।
एक जना सहभागी बिरामी भएपछि अस्थायी रुपमा कोभिड-१९ खोपका सबै क्लिनिकल ट्रायल स्थगित गरेको कम्पनीको भनाई छ । कम्पनीले करिब ६० हजार व्यक्तिलाई परीक्षणमा सहभागी गराउने बताएको थियो।
सेप्टेम्बरको अन्तिम सातातिरबाट कम्पनीले तेस्रो चरणको परीक्षणका लागि सहभागी हुने व्यक्ति छनोट गरेको थियो । अर्जेन्टिना, चिली, कोलम्बिया, मेक्सिको, पेरु, दक्षिण अफ्रिका, अमेरिकालगायतका मुलुकबाट परीक्षणमा सहभागी हुने व्यक्ति छनोट भइरहेको थियो ।
जोन्सन एन्ड जोन्सनले परीक्षणमा सहभागी व्यक्ति बिरामी भएकोबारे एउटा स्वतन्त्र कमिटीले समीक्षा गरिरहेको जनाएको छ ।