एजेन्सी ।
अमेरिकी राष्ट्रपति डोनाल्ड ट्रम्पको पार्टीका मुख्य नेता तथा सहयोगीहरुले पहिलो पटक राष्ट्रपतिमा जो बाइडेनको जितलाई स्वीकार गरेका छन् ।
माथिल्लो सजन सिनेटका मेजोरिटी लिडर रिपब्लिकन सिनेटर मिच म्याकोनलले पहिलोपटक जो बाइडेनलाई ‘प्रेसिडेन्ट–इलेक्ट’ अर्थात निर्वाचित राष्ट्रपति भनेर सम्बोधन गरेका हुन् ।
गएको नोभेम्बर ३ मा भएको चुनावमा डेमोक्र्याटिक उम्मेदवार बाइडेनले राष्ट्रपति ट्रम्पलाई पराजित गरेका हुन् । तर ट्रम्पले भने बिना कुनै ठोस प्रमाण चुनावमा धाँधली भएको र आफूबाट नतिजा खोसिएको आरोप लगाउँदै आएका थिए ।
सिनेट मेजोरिटी लिडर मिचसहित अधिकांश रिपब्लिकन नेताहरु ट्रम्पको सो आरोपको पछि लागेका थिए । तर बाइडेनको जितलाई इलेक्टोरल कलेजका सदस्यहरुले प्रमाणिकरण गरेसँगै शीर्ष रिपब्लिकन नेताहरुले मौनता तोड्न थालेका हुन् । बाइडेनले ३०६ इलेक्टोरल कलेज मत पाएर जित हाँसिल गरेका हुन् । ट्रम्पले २३२ इलेक्टोरल कलेज मत पाएका छन् ।
इलेक्टोरल कलेजले बाइडेनका जितलाई औपचारिकता प्रदान गरेपछि सिनेट लिडर मिचले सम्बोधन गरेका हुन् । हाल रिपब्लिकनको नियन्त्रणमा रहेको सिनेटसँगको सम्बन्ध बाइडेनको कार्यकालका लागि निकै महत्वपूर्ण रहनेछ । आउँदो जनवरी ५ मा जर्जियामा दुई सिनेट सिटका लागि हुने रनअफ चुनावले माथिल्लो सदन सिनेटको शक्ति सन्तुलन निर्धारित गर्छ ।
सिनेट लिडर मिचले बाइडेनसँग सहकार्य गरेर काम गर्नका लागि तयार रहेको पनि बताएका छन् । उनले राष्ट्रपति डोनाल्ड ट्रम्पसँगको ‘सम्बन्ध विच्छेद’ गरेर बाइडेनलाई बधाई दिएका तथा सहकार्यका लागि तयार रहेको बताएका हुन् । ट्रम्प भने अझै पनि हार स्वीकार गर्न तयार भएका छैनन् ।
यस्तै बाइडेनको जितलाई स्वीकार नगरेका तीन देशका नेताले पनि इलेक्टोरल कलेजले जित निश्चित गरेपछि मौनता तोडेका छन् । रुसी राष्ट्रपति भ्लादिमिर पुटिन, ब्राजिलका राष्ट्रपति जायर बोल्सोनारो तथा मेक्सिकोका राष्ट्रपति आन्द्रेस म्यानुएल लोपेज ओब्राडोरले मंगलबार बाइडेनलाई बधाई दिएका हुन् ।
