जनादेश, काठमाडौँ ।
नेपाली कांग्रेसले संसद विघटनविरुद्ध दोस्रो चरणको आन्दोलन अन्तर्गत देशका सबै प्रदेशका निर्वाचन क्षेत्रमा विरोध प्रर्दशन गर्दै खबरदारी गरेको छ ।
केन्द्रीय समितिको निर्णयअनुसार प्रदेशका ३ सय ३० वटै निर्वाचन क्षेत्रमा कांग्रेसले आज संसद विघटनविरुद्ध प्रर्दशन गरेको हो । विरोध कार्यक्रममा कांग्रेस नेताहरुले ५ बर्षका लागि जनमत पाएको नेकपाको केपी ओली नेतृत्वको सरकारले ३ बर्ष नपुग्दै संसद विघटन गर्नु असंवैधानिक भन्दै निर्णय सञ्चाउन दबाब दिएको हो ।
अहिलेको कोरोना महामारीको समयमा अर्बो खर्च हुने चुनाव घोषणा गरेर सरकारले गलत काम गरेको भन्दै अलोकतान्त्रिक र अनैतिक कदम भन्दै सच्चाउन माग गरेको छ । ३ बर्षमा ओली नेतृत्वको सरकारले गरेका गलत एवं भ्रष्ट्रचार, महँगी, वेथिति र विसङगतिको बारेमा कांग्रेसले खबरदारी गरेको छ । हरेक प्रदेश निर्वाचनमा क्षेत्रमा कांग्रेसका केन्द्रीय नेतादेखि स्थानीय नेताहरुलाइ उत्रारेर देशैभर एकसाथ विरोध गरेको छ ।
संसद पुनर्स्थापनाको मुद्दा सर्वोच्चमा विचाराधीन अबस्थामा रहेको भन्दै अदालतलाइ सम्मान गर्दै गलत कार्यको भण्डाफोर गर्न कांग्रेसले कार्यकर्तालाइ भनेको छ । चरणबद्ध आन्दोलनको घोषणा गरेको कांग्रेसले माघ ३ गते ७ सय ५३ वटै पालिका र माघ ८ गते सबै वडाहरुमा विरोध कार्यक्रम गर्ने निर्णय गरेको छ ।
यसअघि पुस १३ गते प्रतिनिधिसभाका १ सय ६५ वटै निर्वाचन क्षेत्रमा कांग्रेसले विरोध कार्यक्रम गर्दै असंवैधानिक कदम सच्चाउन माग गरेको थियो ।