जनादेश, काठमाडौँ ।
नेपाल कम्युनिस्ट पार्टी (नेकपा)का उपाध्यक्ष वामदेव गौतमले नयाँ प्रधानमन्त्री नेकपाभित्रबाटै चयन गर्नुपर्ने प्रस्ताव राखेका छन् ।
नेकपा प्रचण्ड नेपाल समूहका अध्यक्ष पुष्पकमल दाहाल प्रचण्डलाई भेट्न खुमलटार पुगेका गौतमले ओलीलाई सम्मानजनक ढङ्गबाट हटाएर नेकपाभित्रबाटै नयाँ प्रधानमन्त्री चयन गर्नुपर्ने प्रस्ताव गरेका हुन् ।
प्रचण्ड निवास खुमलटारमा प्रचण्ड र गौतमबीच झण्डै एक घण्टा लामो छलफल चलेको थियो । अध्यक्ष प्रचण्डले आफू जहिले पनि पार्टी एकताकै पक्षमा रहेको बताउँदै अहिलेकै अवस्थामा भने प्रधानमन्त्री केपी शर्मा ओलीसँग सहकार्य हुन नसक्ने जनाएका छन् । संसद् विघटन भएसँगै गौतमले कुनै पनि समूहमा सक्रियता देखाएका थिएनन् ।