जनादेश सोसल मिडिया वाच ।
राष्ट्रिय प्रजातन्त्र पार्टी (राप्रपा) का अध्यक्ष कमल थापाले प्रधानमन्त्री केपी शर्मा ओलीलाई अहिले अन्य काम छाडेर कोरोना महामारी नियन्त्रणका ध्यान केन्द्रित गर्न चेतावनीपूर्ण सुझाव दिएका छन् ।
कोरोना अनियन्त्रित र विकराल बन्दै गएकाले जनता सहयोग र भरोसाको खोजीमा रहेको बेला आफै भीडभाड गरिरहेका प्रधानमन्त्री ओलीलाई त्यसो नगर्न अध्यक्ष थापाको सुझाव छ ।
अहिले शिलान्यास र उद्घाटन गर्दै हिँड्ने समय नभएको उनको भनाई छ । अहिलेका लागि महामारी नियन्त्रणतर्फ ध्यान दिन थापाले प्रधानमन्त्रीलाई आग्रह गरेका छन् ।
‘केही समय उद्घाटन, शिलान्यास र पार्टी विवादलाई थाँती राखेर कोरोना महामारी नियन्त्रणमा ध्यान दिन प्रधानमन्त्री केपी शर्मा ओलीलाई आग्रह गर्दछु,’ थापाले सामाजिक सञ्जालतर्फत भनेका छन्, ‘कोरोना अनियन्त्रित र विकराल बन्दैछ। यस अवस्थामा जनता स्वयं प्रमबाट सरकारले गरेका प्रयास र योजनाबारे सुन्न बुझ्न चाहन्छन्। दुःखको बेला जनता भरोसा खोजिरहेछन्।’
केही समय उदघाटन,शिलान्यास र पार्टी विवादलाई थॅाति राखेर कोरोना महामारी नियन्त्रणमा ध्यानदिन प्रम @kpsharmaoli लाई आग्रह गर्दछु।कोरोना अनियन्त्रित र विकराल बन्दैछ।यस अवस्थामा जनता स्वयं प्रमबाट सरकारले गरेका प्रयास र योजनावारे सुन्न बुझ्न चाहन्छन्।दु:खको बेला जनता भरोसा खोजिरहेछन्
— Kamal Thapa (@KTnepal) April 25, 2021
विज्ञहरुले संक्रमण विस्तार हुनबाट जोगिनका लागि भीडभाड हुने गतिविधि रोक्न, सबैतिर स्वास्थ्य मापदण्ड पालना गर्न–गराउन र त्यसका लागि सबैलाई सचेत बनाउन आग्रह गरिरहेका छन्।
जनस्वास्थ्यविद्, संक्रामक रोग विशेषज्ञ एवं चिकित्सकहरुले देखाएको भयावह अवस्थालाई भने सरकार स्वयंले बेवास्ता गर्दै आएको छ ।
