जनादेश, काठमाडौं ।
कालापानी, लिम्पियाधुरालगायतका क्षेत्र भारतीय भूमि रहेको दाबी गर्दै नेपालीको प्रवेश रोक्न भारतले जिल्ला प्रशासन कार्यालय दार्चुलालाई पत्राचार गरेको छ ।
नेपालीहरु अवैध रुपमा लुकीटिपी सो क्षेत्रमा प्रवेश गर्ने गरेको भारतल जनाएको छ । ‘बिभिन्न नेपाली गुट/समूह भारतीय क्षेत्र गुन्जी, कालापानी, लिम्पियाधुरामा अवैध रुपमा लुकिछिपी सीमा पार गरेर आउन चाहन्छन्, जसबाट मिडियाको ध्यान आकृष्ट गर्न सकियोस् र दुवै देशको प्रशासनलाई हैरान बनाउन सकियोस्,’ भारतको धार्चुला प्रशासनले जिल्ला प्रशासन कार्यालयल दार्चुलालाई पठाएको पत्रमा लेखिएको छ, ‘अतः यस प्रकारका कुनै सूचना तपाईंहरुलाई प्राप्त भयो भने त्यसको जानकारी तत्काल दिने कष्ट गरिदिनु होला ।’
भारतले आफनो भूभाग दाबी गर्दै नेपालको कालापानी, लिम्पियाधुरा, गुन्जी, लिपुलेक लगायतका क्षेत्र कबजा गरेको छ । हालै मात्र नेपाल, सरकारले सो कब्जा भएको भूभाग समेटेर नयाँ नक्सा जारी गरेको छ । जसका कारण नेपाल भारत सीमालाई लिएर दुई देश बिच विवाद बढिरहेको छ । नेपाल सरकारले हालै कालापानी नजिक छाङ्रुमा सशस्त्र प्रहरीको सुरक्षा पोष्ट स्थापना गरेको छ ।
