चन्द्रप्रकाश नेपाली
दाङ । दाङमा एम्बुलेन्स दुर्घटना हुँदा चालकसहित चार जना घाइते भएका छन् ।
दुर्घटनामा परि एम्बुलेन्स चालक दंगिशरण गाउँपालिका २ निवासी ३४ वर्षीय मिठुकुमार चौधरी र तुलसीपुर उपमहानगरपालिका १८ निवासी ४४ वर्षीय पुष्पा पुन मगरको अवस्था गम्भीर रहेको छ ।
पुष्पाका पति लोकबहादुर पुनलाई रक्तचापको समस्या बढेपछि उपचारका लागि उनीहरू बाँके लगेर गएका थिए । लोकबहादुरको मृत्यु भएपछि नेपालगञ्जबाट शव बोकेर तुलसीपुरतर्फ आउँदै गरेको रा १ च ३४८ नम्वरको एम्बुलेन्स तुलसीपुर उपमहानगरपालिका १३ स्थित अम्राई खोलामा आज बिहान सवा ३ बजे अनियन्त्रित भइ दुर्घटनामा परेको थियो ।
इलाका प्रहरी कार्यालय तुलसीपुरका प्रहरी प्रवक्ता प्रहरी निरिक्षक चक्रडम्मर पालका अनुसार उनीहरु दुबै जनालाई उपचारका लागि बाँकेस्थित कोहलपुर मेडिकल कलेजमा उपचार भइरहेको छ । दुर्घटनामा परि मगरकी २१ वर्षीया छोरी रोजिना बोहोरा र छोरा पनि घाईते भएको प्रहरीले बताएको छ ।
एम्बुलेन्स झन्डै सडकबाट एकसय मिटर तल खसेको प्रहरीले जनाएको छ ।
