एजेन्सी ।
यूईएफए च्याम्पियन्स लिगको अन्तिम क्वाटरफाइनलमा शनिबार इंग्लिस क्लब म्यानचेस्टर सिटी र फ्रान्सेली क्लब लियोनसँग प्रतिस्पर्धा गर्नेछन् । खेल लिस्बनमा रातको १२:४५ बजे सुरु हुनेछ ।
सिटीले अघिल्लो चरणमा रियल म्याड्रिडलाई ४-२ ले पराजित गर्दा अन्तिम ८ मा स्थान पक्का गरेको थियो । लियोनले भने उपाधिको बलियो दाबेदार मानिएको युभेन्टसलाई अवे गोलको आधारमा पछि पार्दै क्वाटरफाइनलमा स्थान बनायो । यस खेलको विजेताले फाइनल प्रवेशका निम्ति बायर्न म्युनिखको सामना गर्नेछ । बायर्नले शुक्रबार बार्सिलोनामाथि ८-२ को सानदार जित दर्ता गरेको थियो ।
म्यानचेस्टर सिटीका लागि स्टार फरवार्ड सर्जियो अगुएरो चोटका कारण उपलब्ध हुने छैनन् । उनले शल्यक्रिया गरेर सामान्य प्रशिक्षणमा फर्किएपनि पूर्ण रुपमा फिट भएका छैनन् । डिफेन्डर बेन्जामिन मेन्डी पछिल्लो खेलमा प्रतिबन्धित थिए र उनले आजको खेलमा सुरुवाती रोजाईमा खेल्ने अनुमान गरिएको छ ।
लियोनलाई भने चोटका कारण निकै समस्या परेको छ । युभेन्टसविरुद्ध खेलमा चोटका कारण परिवर्तन भएका डिफेन्डर जेसन डीनाएर खेल्नेमा शंका छ । डीनाएर सन् २०१८ मा म्यानचेस्टर सिटी छोडेर लियोन आएका थिए । उनीसँगै म्याक्स्वेल कर्नेट र केन्नी टेटे पनि चोटका कारण बाहिर बस्ने सम्भावना छ । युसुफ कोने भने उपलब्ध नहुने पक्का भइसकेको छ ।
सिटी प्रिमियर लिग उपाधि रक्षा गर्नबाट बन्चित भएपछि च्याम्पियन्स लिगलाई नै मुख्य लक्ष्य बनाएर अगाडि बढिरहेको छ । रियल म्याड्रिडलाई हराएपछि उच्च मनोबल रहेको सिटी लियोनलाई हल्का लिने पक्षमा भने छैन । रुडी गार्सियाको टोलीले युभेन्टसविरुद्ध दोस्रो लेगमा पराजित भएपनि रक्षात्मक रुपमा राम्रो प्रदर्शन गरेको थियो ।
लियोनले टोलीले च्याम्पियन्स लिगको पछिल्लो १५ खेलमा ३ खेल मात्र जितेको छ । यद्यपि लियोनले पछिल्लो १६ खेलमध्य २ खेलमा मात्र गोल गर्न चुकेको छ । सिटी भने कोरोना संक्रमणपछि झनै राम्रो लयमा देखिएको छ । टोलीले औसतमा प्रतिखेल झन्डै ३ गोल गरेको छ ।
सिटीको आक्रमण ग्याब्रीएल जेससले सम्हाल्नेछन् । रियलविरुद्ध जितमा उनकै गोलले सिटी ढुक्क हुने अवस्था बनेको थियो । उनलाई मिडफिल्डर केभिन डे ब्रुएनसँगै रहिम स्टर्लिङले साथ दिनेछन् । यता लियोनको आक्रमणको जिम्मेवारी कप्तान मेम्फिस डिपाएमा हुनेछ । युभेन्टसविरुद्ध पेनाल्टीमा गोल गरेका उनले च्याम्पियन्स लिगमा ६ गोल गरिसकेका छन् ।
