जनादेश वाच।
इटालीे भ्रमणमा रहेका प्रधानमन्त्री पुष्पकमल दाहाल ‘प्रचण्ड’ले संयुक्त राष्ट्रसंघका महासचिव एन्टोनियो गुटेर्रेस र बंगलादेशकी प्रधानमन्त्री शेख हसिनासँग द्विपक्षीय वार्ता गर्ने भएका छन् । दुवै भेटवार्ता इटालीको राजधानी रोममा आज हुने भियनास्थित नेपाली दूतावासले जनाएको छ । प्रधानमन्त्री प्रचण्डले राष्ट्रसंघको कार्यक्रमको साइडलाइनमा आज बंगलादेशकी प्रधानमन्त्री र राष्ट्रसंघका महासचिवसँग छुट्टाछुट्टै भेटवार्ता गर्न लागेका हुन् ।
उनले आज पहिला बंगलादेशकी प्रधानमन्त्री शेख हसिनासँग द्विपक्षीय भेटवार्ता गर्नेछन् । त्यसपछि संयुक्त राष्ट्रसंघका महासचिव एन्टोनियो गुटेर्रेससँग भेट हुनेछ ।
यसैबीच, परराष्ट्र मन्त्रालयले प्रचण्डको चीन र अमेरिका भ्रमणको तयारी सुरु गरेको छ । आगामी असोजको पहिलो साता हुने उक्त भ्रमणको तयारी परराष्ट्रले सुरु गरेको हो । परराष्ट्र मन्त्रालयका अनुसार प्रधानमन्त्री चीनको हन्जाउमा हुन लागेको १९औँ एसियन खेलको उद्घाटन समारोहमा सहभागी हुन त्यसतर्फ जान लागेका हुन् । एसियन खेलको उद्घाटन चीनका राष्ट्रपति तथा प्रधानमन्त्रीमध्ये एकजनाले गर्नेछन् ।
एसियन खेल समारोहमा सहभागी भएपछि प्रधानमन्त्री बेइजिङ जानेछन् । बेइजिङमा उनले चिनियाँ समकक्षीसँग द्विपक्षीय वार्ता र चिनियाँ राष्ट्रपतिसँग शिष्टाचार भेटवार्ता गर्नेछन् । बेइजिङमा उनले चिनियाँ कम्युनिस्ट पार्टीका अन्य नेताहरुसँग पनि भेटवार्ता गर्नेछन् । परराष्ट्र मन्त्रालय स्रोतका अनुसार सेप्टेम्बर २२ अर्थात अगामी असोज ५ गतेदेखि सुरु हुने गरी प्रधानमन्त्रीको चीन भ्रमणको तयारी भइरहेको छ ।
स्रोतका अनुसार चीन भ्रमणकै बेला संयुक्त राष्ट्रसंघको ७८औँ महासभा अमेरिकाको न्यूयोर्कमा सुरु हुनेछ । राष्ट्रसंघको महासभामा भाग लिन न्यूयोर्क जाने इच्छा पनि प्रधानमन्त्रीले व्यक्त गरेका छन् । “प्रधानमन्त्रीज्यूले मिलेसम्म दुवैतिर जाने गरी भ्रमणको तयारी गर्न भन्नुभएको छ । मिल्दै नमिले चीन भ्रमणलाई प्राथमिकतामा राख्न भन्नुभएको छ । तर दुवैतिर जाने समय एउटै परेकोले भ्रमण तालिका मिलाउन गाह्रो भइरहेको छ,” परराष्ट्र मन्त्रालय स्रोतले भन्यो ।
एसियन गेम्स चीनको हन्जाउमा अगामी सेप्टेम्बर २३ देखि अक्टोबार ८ (असोज ६ गतदेखि २१ गतेसम्म) हुनेछ । संयुक्त राष्ट्रसंघको ७८औँ महासभा भदौ ६ गतेदेखि सुरु हुनेछ । महासभामा उच्चस्तरीय पाहुनाको सम्बोधन असोज २ गतेदेखि सुरु हुनेछ ।
