एजेन्सी ।
स्पेनिस ला लिगा फुटबल अन्तर्गत बुधबार राति भएको खेलमा रियल मड्रिडले संघर्षपूर्ण जित निकालेको छ ।
लिगको तेस्रो खेलमा रियलले दोस्रो जित दर्ता गरेको हो । रियल मड्रिडले रियल भालाडोलिडलाई १–० ले पराजित गर्यो ।
घरेलु मैदानमा भएको खेलमा रियल मड्रिडका लागि ६५ औँ मिनेटमा विनिसियस जुनियरले गरेको गोल नै निर्णायक बन्यो ।
अतिरिक्त खेलाडीका रुपमा मैदान छिरेका जुनियरले गोल गरेर साबिक विजेता रियल मड्रिडलाई लिगमा सिजनको पहिलो घरेलु मैदानको खेलमा जित दिलाए ।
जितपछि गेटाफे, भ्यालेन्सिया र भिल्लारियलको जस्तै रियल मड्रिडको पनि सात अंक भएको छ।
बुधबार राति नै भएको खेलमा भिल्लारियलले एलाभेसलाई ३–१ तथा एल्चेले एइबरलाई १–० ले पराजित गर्दा एथ्लेटिको मड्रिड र हुयस्काले गोलरहित बराबरी खेलेका छन् ।
