जनादेश वाच
पार्टीका सबै कमिटीमा अल्पमतमा पर्न थालेपछि प्रधानमन्त्री केपी ओलीले सके पूर्वएमालेलाई एक ठाउँमा ल्याउने नसके ध्रुवीकरण तीव्र पार्ने रणनीति अख्तियार गरेका छन् ।
ओलीले पार्टीभित्र ध्रुवीकरणका लागि आफ्नो गुटका भेला थालेका हुन् । ओली पक्षले मंगलबार गोप्य भेलाको आयोजना गरेको हो । ओली पक्षले जुम मिटिङमार्फत् आफ्ना कुरा राख्न थालेको छ ।
स्रोतका अनुसार ओली समूहले बुधबार प्रदेश नम्बर एकको कमिटी स्तरीय भेला आयोजना गरेको थियो । भेलामा १७ जना नेताहरुले पार्टीको पछिल्लो विवादबारे जिज्ञासा राखेका थिए ।
नेताहरुलाई ओलीले जनताको बहुदलीय जनबाद(जबज)मा एक हुनुपर्ने, नभए आफूहरु सकिने भन्दै कडा निर्देशन दिए । जबजलाई पूर्वएमालेमा मात्रै नभएर पूर्वमाओवादीले पनि आत्मसाथ गर्न सक्ने उनको भनाई छ। पूर्वएमाले नेता मदनभण्डारीद्वारा उत्पादित विचार जबज र पूर्वमाओवादीको २१ सौँ शताब्दीको जनवादका राम्रा पक्षलाई समेटेर नेकपाले तात्कालिक कार्यक्रम जनताको जनवाद बनाउने निर्णय गरेको थियो।
उपप्रधानमन्त्री रहेका नेकपा सचिवालय सदस्य ईश्वर पोखरेलले भेलालाई विशेष सम्बोधन गरेका थिए ।
भेलामा उनले अहिले नै एकता नभत्कने पनि तर पूर्वएमाले र पूर्वमाओवादी भन्दा पनि विचार मिल्नेहरु एकठाउँमा उभिने बताए । त्यस्तै पोखरेले कर्णाली प्रदेशका मुख्यमन्त्रीले प्रमुख सचेतकलाई हटाएर गल्ती गरेको भन्दै नसच्याए परिणाम भयावह हुने चेतावनी पनि दिएका छन् ।
स्थायी कमिटी बैठकको निर्णयविपरीत निर्देशन
सम्बोधनका क्रममा ओली र पोखरेलले प्रदेश नम्बर एकका सबै जिल्ला र निर्वाचन क्षेत्रमा मदन भण्डारी फाउन्डेसन सक्रिय तुल्याउन निर्देशन दिएका थिए । पोखरेलको निर्देशन २६ गते सकिएको स्थायी कमिटी बैठकको निर्णयविपरीत हो । स्थायी कमिटी बैठकले नेताहरूको नाममा खुलेका प्रतिष्ठानहरूलाई नियमन गर्ने निर्णय गरेको थियो ।
भदौ २६ मा सम्पन्न स्थायी कमिटी बैठकले नेताहरूको नाममा खुलेका प्रतिष्ठानहरूलाई नियमन गर्ने निर्णय गरेको थियो ।
यस्तो थियो स्थायी कमिटीको बैठकपछि सर्कुलर गरिएको अन्तरपार्टी निर्देशनः
“पार्टीका विभिन्न नेताका नाममा विभिन्न प्रष्ठिान वा संघ÷संस्थाहरू परिचालित छन् । यी मध्ये अधिकाङ्श गुटबन्दीको माध्यम बन्दै गएका छन् । गुटबन्दी रोक्न प्रतिष्ठानहरूलाई नियमन गर्न जरुरी छ । त्यसका लागि निम्नानुसार गर्ने : पार्टीले यस्ता संस्थाहरूमा नेता वा कार्यकर्ताको संलग्नता र तिनको आर्थिक स्रोत तथा क्रियाकलापका बारेमा तथ्यपरक जानकारी प्राप्त गर्ने । त्यस्ता संस्थाहरूमा पार्टीका नेता, कार्यकर्ता वा सदस्यहरूको संलग्नताको स्वरूप निश्चित गर्ने । सचिवालयले प्रतिष्ठानहरूको सञ्चालन, व्यवस्थापन तथा नियमन विधि निश्चित गर्न स्पष्ट कार्यादेशसहित कार्यदल गठन गर्ने । कार्यदलको प्रतिवेदन प्राप्त भएपश्चात् त्यसउपर छलफल गरी आवश्यक निर्णय लिने । तबसम्मका लागि पार्टीद्वारा गठित वा पार्टीका नेता कार्यकर्ता सम्मिलित कुनै पनि प्रष्ठिानहरूलाई प्रदेश, जिल्ला र स्थानीय तहमा शाखा गठन नगर्न र गतिविधि नगर्न निर्देशन दिने” ।
ओलीको तयारी पार्टीमा सकेसम्म पूर्वएमालेलाई मोर्चावन्दी गराउने नसके पार्टी फुटका लागि माथिदेखि तलसम्म आधार तयार पार्ने देखिएको छ । उनले यस अघि नै कार्यकारी अध्यक्ष पुष्पकमल दाहाल प्रचण्डसँग अलग अलग बाटो लाग्ने प्रस्ताव गरिसकेका छन् ।
केहीदिन अघिमात्र ओली गुटका केही नेताहरु जबजमा आधारित रहेर पूर्व एमालेलाई एक ठाउँमा ल्याउने पहल गरिदिन प्रदीप नेपालकोमा पुगेका थिए ।
यो पनि हेर्नुस्
शितल निवास फेरि सक्रिय, ओलीको फकाउने फोन, प्रचण्डले भने- ‘नो’
पूर्वमाओवादी नेता तान्ने ओलीको दाउ बुझेपछि विच्किएका थिए प्रचण्ड
