एजेन्सी । इटालयिन सिरी ‘ए’ मा आज राति ३५औं चरणको विभिन्न दुई खेलमा प्रतिस्पर्धा हुँदैछ । उपाधिको मुखैमा रहेको शीर्षस्थानको युभेन्टसले उडिनेजेको तथा लाजियोले काग्लिएरीसँग प्रतिस्पर्धा गर्दैछ ।
युभेन्टस र उडिनेजेको खेल नेपाली समयअनुसार उडिनेसीको मैदानमा राति ११ः१५ बजे हुनेछ । घरेलु टोली उडिनेजेलाई पराजित गर्दै युभेन्टस उपाधि यात्रालाई थप मजवुत बनाउने लक्ष्यमा मैदान उत्रनेछ । ८० अंक रहेको युभेन्टसले उडिनेसीलाई हराए दोस्रो स्थानको एटलान्टालाई ९ अंकले पछि पार्नेछ । दोस्रो स्थानको एटलान्टाको ७४ अंक छ ।
उच्च फर्ममा रहेका क्रिस्टियानो रोनाल्डो, पाउलो डिबाला, मिरालेम प्यानिच, एलेक्स सान्द्रो, जुवान क्वार्डाडो र म्याथिज डि लिग्ट जस्ता खेलाडीको युभेन्टसलाई साथ रहेको छ । यता, उडिनेजे पनि घरेलु मैदानमा युभेन्टसलाई स्तब्ध पार्दै अंक तालिका सुधार गर्ने योजनामा हुनेछ । उडिनेसी ३६ अंक जोडेर १६औं स्थानमा छ ।
यस्तै अर्काे खेलमा लाजियो र काग्लिएरीबीच राति १ः३० बजे प्रतिस्पर्धा हुदैछ । काग्लिएरीलाई हराए लाजियोले शीर्ष चारमा आफ्नो स्थान पक्का गर्नेछ । लाजियो ६९ अंक जोडेर चौथो स्थानमा तथा काग्लिएरी ४२ अंक जोडेर १३औं स्थानमा छ ।
