एजेन्सी ।
इंग्लिस क्लब म्यानचेस्टर सिटीमाथि जित हासिल गर्दै फ्रान्सेली क्लब लियोनले यूईएफए च्याम्पियन्स लिगको सेमिफाइनलमा स्थान पक्का गरेको छ । शनिबार लिस्बनमा भएको खेलमा लियोन ३-१ ले विजयी रहयो ।
लियोनको जितमा वैकल्पिक खेलाडीका रुपमा मैदान प्रवेश गरेका फरवार्ड मौसा डेम्बेलेले २ र म्याक्स्वेल कर्नेटले एक गोल गरे । सिटीका लागि केभिन डे ब्रुएनले दोस्रो हाफमा बराबरी गोल गरेपनि त्यसपछि गोलरक्षक एडरसनले खराब प्रदर्शन गर्दा सिटीले हारको सामना गर्नुपर्यो ।
खेलको २६ औं मिनेटमा लियोनले अग्रता लिएको थियो । म्याक्सवेल कर्नेटले पेनाल्टी क्षेत्र बाहिरबाट गोलरक्षक एडरसन पोजिसनमा नभएको मौकामा गरेको प्रहार गोल भएको थियो । एरिक गार्सियाले तोको एकाम्बीबाट बल खोसेपछि आएको बललाई कर्नेटले पहिलो टचमा नै गोल गरेका थिए ।
गोल खाएलगत्तै म्यानचेस्टर सिटीका केभिन डे ब्रुएनको फ्रिकिकलाई गोलरक्षक मिगुएल लोपेसले विफल पारे । सिटीले त्यसपछि लगातार आक्रम बुनेपनि गोलरक्षक लोपेस लगातार बाधक बनिरहे । जोआओ क्यान्सेलोले पेनाल्टी क्षेत्रभित्र भिडभाड भएको अवस्थामा प्रहार गरेपनि लोपेसले अगाडी बढ्दै उक्त प्रहारलाई विफल पारे ।
पहिलो हाफको २ मिनेट बाँकी रहँदा रहिम स्टर्लिङले खेल बराबरी गर्ने सुवर्ण अवसर खेर फाले । उनले ६ यार्ड बक्स भित्रबाट गरेको प्रहारमा लोपेस बाधक बने । पहिलो हाफमा सिटीले आक्रमण बुन्ने प्रयास गर्दै बल पोसेसनमा पकड बनाएपनि खेल बराबर गर्न भने सकेन ।
दोस्रो हाफमा पनि पहिलो हाफकै प्रदर्शनलाई निर्नातारता दिएको सिटीले बराबरी गोल फर्काउन ७० औं मिनेटसम्म कुर्नुपर्यो । पेनाल्टी क्षेत्रभित्र स्टर्लिङले दिएको कटब्याकमा डे ब्रुएनले पहिलो टचमा नै उत्कृष्ट फिनिस गर्दै खेल बराबरीमा ल्याए । अग्रता लिएको दुई मिनेटपछि नै ग्याब्रिएल जेससको प्रहारलाई लोपेसले विफल पार्दै खेल बराबरीमा नै कायम राखे ।
७७ औं मिनेटमा सिटीले अग्रता लिने सुवर्ण अवसर गुमायो । स्टर्लिङले पेनाल्टी क्षेत्रभित्र नै चिप पास निकाल्दै अनमार्क रहेका जेससलाई भेटेपनि ब्राजिलियन फरवार्डको प्रहार निकै फितलो रहयो । ७९ औं मिनेटमा लियोनका मौसा डेम्बेलेले गोल गर्दै पुन अग्रता दिलाए ।
मैदान प्रवेश गरेको ४ मिनेट नबित्दै डेम्बेलेले अफसाइड ट्रयाप बिट गर्दै वन भर्सेस वनको स्थितिमा पेनाल्टी क्षेत्र बाहिरबाट गोल गरे । हौसेम औआरको लामो पासमा सिटीको डिफेन्स झुक्किएपछि एक्लै अघि बढेका डेम्बेलेको प्रहार गोलरक्षक एडरसनले बचाउने प्रयास गरेपनि उनलाई लाग्दै गोलमा परिणत भएको थियो ।
८६ औं मिनेटमा सिटीले खेल बराबरी गर्ने अवसर चुकायो । स्टर्लिङले पोस्टमा गोलरक्षक नभएको अवस्थामा बललाई गोलको दिशा दिन नसक्दा सिटीले खेल बराबर गर्न सकेन । लगत्तै अर्कोतर्फ लियोनले खेलमा अग्रता दोब्बर पार्यो । गोलरक्षक एडरसनले सहज बचाउ गर्नुपर्ने बल फुत्काएपछि वैकल्पिक खेलाडी डेम्बेलेले व्यक्तिगत दोस्रो गोल गर्दै ३-१ को अग्रता दिलाए ।
इन्ज्युरी समयको तेस्रो मिनेटमा लोपेसले अर्को उत्कृष्ट बचाउ गर्दै खेलमा लियोनको अग्रता कायम राखे । लगत्तै काइल वाल्करको हेडरले पोस्टको दिशा लिन सकेन ।
लियोनले अब सेमिफाइनलमा बायर्न म्युनिखको सामना गर्नेछ । अर्को सेमिफाइनलमा पीएसजी र आरबी लाइप्जिगले खेल्नेछन् ।
