पपुवा न्युगिनीमा गएको भीषण पहिरोमा परी मृत्यु हुनेको सङ्ख्या ६७० नाघेको अन्तर्राष्ट्रिय आप्रवासन सङ्गठनका एक अधिकारीले आइतबार सञ्चारकर्मीलाई जानकारी दिनुभएको छ ।
प्रशान्त महासागरीय टापुका लागि संयुक्त राष्ट्रसङ्घीय आप्रवासन निकायका प्रमुख सेर्हान अक्टोप्राकका अनुसार यसको प्रभाव सुरुमा सोचेभन्दा निकै ठूलो देखिएको छ ।
‘अस्ट्रेलियन ब्रोडकास्टिङ कर्पोरेसन’लाई दिएको अन्तर्वार्तामा अक्टोप्राकले १५० भन्दा बढी घर ६ देखि ८ मिटर गहिरो भग्नावशेषमा पुरिएको र ६७० भन्दा बढीले ज्यान गुमाउन हुनसक्ने बताउनुभयो ।
एङ्गा प्रान्तको विपद क्षेत्र वरपरको क्षेत्र पनि जोखिमपूर्ण रहेको र लगातार पहिरो खसेका कारण करिब एक हजार २५० जनालाई सुरक्षित स्थानमा सारिएको अधिकारीहरूले बताएका छन् ।
पपुवा न्यूगिनीको राजधानी पोर्ट मोरेस्बीबाट ६०० किलोमिटर उत्तरपश्चिममा रहेको एङ्गा प्रान्तको दुर्गम क्षेत्रमा स्थानीय समयअनुसार शुक्रबार बिहान करिब ३ः०० बजे भीषण पहिरो गएको थियो ।
पपुवा न्यूगिनीस्थित संयुक्त राष्ट्रसङ्घको कार्यालयले शनिबार एक विज्ञप्ति जारी गर्दै एङ्गा प्रान्तको लगाइप पोर्गेरा जिल्लामा पीडित र उनीहरूका परिवारप्रति गहिरो समवेदना प्रकट गरेको छ ।
“हताहत हुनेको सङ्ख्या एकीन हुन बाँकी छ, तर प्रारम्भिक रिपोर्टले मृतकको सङ्ख्या अत्यधिक हुन सक्ने सङ्केत गरेको छ । खोजी तथा उद्धारकार्य जारी छ, यद्यपि निरन्तरको पहिरो र पहिरोसँगै खसेको ढुङ्गाले यी प्रयासहरूलाई प्रभावित गरिरहेको छ,” राष्ट्रसङ्घीय कार्यालयका प्रवक्ताले भने ।
