जनादेश, बाँके ।
बाँकेमा कोरोेना भाइरस संक्रमण फैलन नदिन आज र भोलि सर्वसाधारणलाई हिँड्डुल गर्न समेत नपाउने गरी निषेधाज्ञा जारी गरिएको छ ।
सातामा दुई दिन निषेधाज्ञालाई कडाईका साथ लागु गर्दा कोरोना संक्रमणको चेन टुट्ने र संक्रमण नियन्त्रणमा आउने विज्ञहरुको सुझावपछि कोभिड व्यवस्थापन संकट समितिको भदौ १२ गतेको बैठकले हरेक शुक्रबार र शनिबार सर्वसाधारणहरुलाई हिँड्डुल गर्न समेत नपाउने गरी निषेधाज्ञा जारी गर्ने निर्णय गरेको थियो ।
निषेधाज्ञाको अवधिमा औषधि, खानेपानी, ग्यास, पेट्रोलियम पदार्थ, विद्युत, दूरसञ्चार, एटिएम र फोहोरमैला व्यवस्थापन सेवाबाहेक अन्य सबै सेवामा रोक लगाइएको छ । निषेधाज्ञालाई कडाईका साथ पालना गराउन ठूलो संख्यामा सुरक्षाकर्मी परिचालन गरिएको छ ।
बाँकेमा पछिल्ला दिनहरुमा दैनिक ३० देखि ४० जनामा संक्रमण देखिँदै आएको छ । बाँकेमा संक्रमितहरुको संख्या एक हजार १३९ पुगेको छ ।
