एजेन्सी ।
फ्रान्समा कोरोना भाइरसको दोस्रो लहरको संक्रमण देखिएको छ । संक्रमण बढेसँगै राजधानी पेरिससहितका ९ शहरमा कर्फ्यू घोषणा गरिएको छ ।
संक्रमण बढेपछि फ्रान्समा हाल स्वास्थ्य संकटकाल घोषणा गरिएको छ ।
राजधानी पेरिससमेत ९ शहरमा शनिबारदेखि लागू हुने गरी राती ९ बजेदेखि बिहान ६ बजेसम्म कर्फ्यू लागु हुने फ्रान्सका राष्ट्रपति इम्यानुएल म्याक्रोंले टेलिभिजन सम्बोधनमार्फत बताएका छन् ।
म्याक्रोंले टेलिभिजनमा बोल्दै शनिबारदेखि ९ शहरमा लागु हुने कर्फ्यू चार हप्तासम्म कायम रहने बताए ।
फ्रान्समा ७ लाख ७९ हजारमा संक्रमण पुष्टि भएको छ । पछिल्लो २४ घण्टामा मात्रै त्यहाँ २२ हजार ५९१ मा संक्रमण पुष्टि भएको छ ।
कोरोना नियन्त्रण हुँदै गएको ठानिएका कतिपय देशमा दोश्रो लहर देखिएपछि चिन्ता बढेको छ । विश्व स्वास्थ्य संगठनले आगामी वर्षको मध्यसम्म कोरोनाविरुद्धको खोप आउने अपेक्षा गरेको छ ।