जनादेश वाच ।
नेपालमा विकसित राजनीतिक घटनाक्रमबारे चीनले उच्च चासो प्रकट गरिरहेको छ । यो अवस्थाको वास्तविक तस्विर बुझ्न चीनको सत्तारुढ दल चिनियाँ कम्युनिस्ट पार्टी (सिपिसी) ले आज उच्चस्तरीय टोली नेपाल पठाउने भएको छ ।
सत्तारूढ दल नेपाल कम्युनिस्ट पार्टी (नेकपा) दुई धारमा विभाजित बनेपछि नेकपा नेताहरूसँग भेटेरै बुझ्न सिपिसीको टोली नेपाल आउन लागेको हो ।
आइतबार सिपिसीको टोली नेपाल आउने टोलीले प्रधानमन्त्री, राष्ट्रपतिमात्र होइन नेकपाका असन्तुष्ट सबै पक्षका नेताहरुलाई भेटेर जानकारी लिने बताइएको छ ।
भ्रमण टोलीलाई सिपिसीको विदेश विभागका उपप्रमुख गुओ येझोउले नेतृत्व गर्ने बताइएको छ। टोलीमा चार सदस्य रहने छन्। टोली नेपालमा चार दिनसम्म बस्ने बताइएको छ।
टोलीले नेकपाको विभाजन रोक्नका लागि प्रयास गर्ने बुझिएको छ । टोलीको भ्रमण अघि नेपालका लागि चीनकी राजदूत होउ यान्छीले प्रतिनिधिसभा विघटनपछि नेकपा अध्यक्ष पुष्पकमल दाहाल प्रचण्ड र विदेश विभाग प्रमुख माधवकुमार नेपालसँग भेट गरेकी थिइन्।
राष्ट्रपति विद्यादेवी भण्डारीसँग पनि उनले भेट गरेकी थिइन्। भेटमा नेकपाको आन्तरिक राजनीतिबारे यान्छीले चासो व्यक्त गरेको बताइएको छ । यद्यपि प्रतिनिधिसभा विघटनपछि यान्छीले प्रधानमन्त्री केपी शर्मा ओलीसँग भेटघाट गरेको भने सार्वजनिक भएको छैन ।
चीन नेकपा एकताका पक्षमा रहेको सन्देश दिँदै आएको छ । यसअघि नेकपा विभाजनको संघारमा पुग्दा पनि राजदूत यान्छीको सक्रियता बढेको थियो ।
