एजेन्सी ।
इंग्लिस प्रिमियर लिग फुटबल अन्तर्गत आइतबार राति भएको खेलमा म्यानचेस्टर सिटीले चेल्सीमाथि प्रभावशाली जित दर्ता गरेको छ ।
घरेलु मैदानमै भएको खेल चेल्सी म्यानचेस्टर सिटीसँग ३–१ ले पराजित भएको हो । सिटीका लागि १८ औँ मिनेटमा इल्केयी गुण्डोगान, २१ औँ मिनेटमा फिल फोडिन तथा ३४ औँ मिनेटमा केविन डू ब्रूयनाले गोल गरे ।
पहिलो हाफमा नै तीन गोल खाएको चेल्सीले इन्जुरी समयको दोस्रो अर्थात ९२ औँ मिनेटमा एक गोल फर्कायो । उसका लागि हड्सन–ओडोइले गोल गरेका हुन् ।
जितपछि पाँचौँ स्थानमा पुगेको म्यानचेस्टर सिटीको १५ खेलबाट २९ अंक भएको छ । १७ खेलबाट २६ अंक भएको चेल्सी आठौँ स्थानमा झरेको छ ।
यस्तै आइतबार राति नै भएको खेलमा जित निकालेको लेस्टर सिटी १७ खेलबाट ३२ अंकसहित तेस्रो स्थानमा पुगेको छ।
अवे मैदानमा भएको खेलमा लेस्टरले न्यूक्यासल युनाइटेडलाई २–१ ले पराजित गरेको हो ।
