नेपालगन्ज ,
कोरोना भाइरस संक्रमण बढ्दै गएपछि सिल गरिएको नेपालगन्ज उपमहानगरका विभिन्न क्षेत्रका मुख्य सडकमा काँडे तार लगाइएको छ ।
नेपालगन्जको धम्बोझी चोकदेखि सेतु विक चोक जाने सडक, पुष्पलाल चोकदेखि हुलाकी राजमार्ग, बसपार्क लगायतका क्षेत्रमा काँडे तार लगाइएको हो । निषेधाज्ञाको अवज्ञा हुने भएकाले सिलपछि नेपाली सेना परिचालन गरिएका छन् ।
अति आवश्यक बाहेक स्थानीय प्रशासनले हिँडडुलमा पूर्णरुपमा रोक लगाएको छ ।बजार पूर्णरुपमा बन्छ । शिक्षण अस्पताल नेपालगन्ज आसपासका औषधि पसल पनि बन्द गरिएका छन् ।
बाँकेका प्रमुख जिल्ला अधिकारी रामबहादुर कुरुम्बाङले सील गरिएका क्षेत्रमा औषधि पसल बन्द भएपछि बिरामीहरुका लागि आवश्यक पर्ने औषधि घरमै पु¥याउने व्यवस्था मिलाएको जनाए ।
बाँकेमाआज ४६ जनामा कोरोना संक्रमण देखिएको छ । यस अघि तीन दिनमा ९७ जनामा कोरोना देखिएको थियो । बाँकेमा ७ सय ८७ जना कोरोना संक्रमित भइसकेका छन् । प्रदेश सांसद, वडा अध्यक्ष, व्यवसायी र सरकारी अधिकारीहरुमा समेत कोरोना देखिएको हो ।
