- प्रभात रावत,
—————–
राक्षस
जसका सिङ छैनन्
दाह्रा पनि देखिन्नन्
तर
भक्षण उत्रै छ
त्रास उस्तै छ ।
गर्जिन्न अचेल
बाघ, भालु र सिंह जस्तै
राक्षस !
लामा-लामा जटा हल्लाउँदै
दौडिन्न अचेल
ठूलो ठूलो कर्कश आवाज
सुनिँदैन अचेल ।
थाहा छैन
कुन समय हो –
राक्षसहरू विचरण गर्ने
थाहा छैन
कुन कवच हो –
राक्षसहरुले पहिरिने
तर,
चेलीबेटी हराएकै छन् – गाउँमा
युवाहरु हराएकै छन् – गाउँमा
वैभव,
साँघुरिँदै गएको छ- देशको ।
पहिले पहिले पुर्खाहरू
लड्नु हुन्थ्यो रे
भिड्नु हुन्थ्यो रे राक्षससँग
हप्काउनु हुन्थ्यो रे भूतलाई
खुरु-खुरु भारी बोक्थे रे भूत
दिनभरि हलो जोत्थे रे भूतहरु !
आज
समय फेरियो
र,
नियति दु:खिरहेछ अविराम ।
नरभक्षी राक्षस
जसलाई मारिएको स्मृति दिवस
मान्छे जस्तै लाग्ने राक्षसहरू राखेर मञ्चमा
खिया लागेको तरबार घुमाएर
आत्मरति गरिरहेछौ हामी ।
आजकल
भक्ति थापाका रगतहरू
कालु पाण्डेका पाण्डेहरू
चस्मा लगाएका इन्टरनेट आँखाले
आफ्नो बूढो घरको छानामा पानी चुहिएको
अनि,
अनाज फल्ने बारीको साँधमा
ढुङ्गो हराएको
गुगल म्यापमा हेरिरहेछन् ।
