काठमाडौं। दक्षिण अमेरिकी राष्ट्र बोलिभियामा बुधबार राति ‘कु’को असफल प्रयास भएको छ । ‘कु’को प्रयत्न गर्ने सैन्य नेतालाई सुरक्षाकर्मीले पक्राउ गरेका छन् ।
प्लाजा मुरिलो स्क्वायरको ला पाजस्थित राष्ट्रपति भवनमा सैनिकको प्रवेश भएको केही घण्टापश्चात बोलिभियन सुरक्षाकर्मीले अवस्था नियन्त्रणमा लिएका थिए ।
पक्राउ परेका विद्रोही सैन्य नेता जनरल जुआन जोसे जुनिगाले लोकतन्त्रको पुनसंरचना गर्न चाहेको बताएका छन् । उनले राष्ट्रपति लुइस आर्सलाई सम्मान गरे पनि सरकार परिवर्तन गर्नु आफ्नो उद्देश्य रहेको बताए ।
राष्ट्रपति आर्सले सो “कु’ प्रयासको निन्दा गर्दै सर्वसाधारणलाई लोकतन्त्रको पक्षमा परिचालित हुन आग्रह गरेका थिए ।
‘हामी फेरी पनि ‘कु’ प्रयासले बोलिभियाको मानिसको जीवन लिएको हेर्न सक्दैनौँ,’ राष्ट्रपति भवनभित्रबाट जारी भएको टेलिभिजन सन्देशमा उनले बताएका छन् ।
राष्ट्रपतिको आव्हानसँगै हजारौं नागरिक सडकमा उत्रिएका थिए । सरकार र लोकतन्त्रको समर्थनमा सडकमा आवाज लगाउनेहरुको शब्दसँग राष्ट्रपति आर्सको विचार मिलेको बीबीसीले उल्लेख गरेको छ ।
उनले नयाँ सैन्य कमाण्डर नियुक्ति गर्ने बताएका छन् । घटनाबारे सरकारी वकिलको कार्यालयले अपराधिक मुद्दामा अनुसन्धान सुरु गरेको छ ।
बोलिभियामा यसअघि पनि पटक पटक यस्तो प्रयास भएको थियो ।
