चन्द्रप्रकाश नेपाली, घोराही ।
दाङको बेलझुण्डी रंगशाला निर्माणको काम अन्तिम चरणमा पुगेको छ । दुई बर्ष अघिदेखि निर्माण सुरु भएको रंगशालाले आफ्नो अन्तिम रुप लिदैछ । आठौं राष्ट्रिय खेलकुद प्रतियोगिताका एथ्लेटिक्स, फुटबल लगायतका खेल भएको रंगशालाको काम अन्तिम चरणमा पुगेको हो ।
निर्माणाधीन रंगशालाको भिआईपी प्याराफिट भित्र कार्पेटिङ, बायरिङ र केही पार्टेशनको काम बाहेक सम्पूर्ण काम सकिएको निर्माण कम्पनीले जनाएको छ । रंगशाला २४ करोड २४ लाख रुपैयाँमा निर्माण भैरहेको छ ।
भिआईपी प्याराफिट, खेलाडीको लागि चेन्जिङ रुम, रेफ्री रुम, मिडिया सेन्टर निर्माण भएको छ ।
फिफाको मापदण्ड अनुसार निर्माण गरिएको यस रंगशालामा भारतको कोलकाताबाट ल्याएर दुबो रोपिएको छ भने प्याराफिटको सामाग्री चीनबाट ल्याईएको हो । अत्याधुनिक रंगशाला बनेपछि खेलाडीहरु पनि उत्साहित बनेका छन् ।
