जनादेश, दाङ ।
डिभिजन वन कार्यालय दाङ र पुरन्धारा सव डिभिजन वन कार्यालयको संयुक्त गस्ती टोलीले बबई गाँउपालिका ५ जौबारीमा अवैद्य चिरान काठ सहित १ जनालाई पक्राउ गरेको छ ।
पक्राउ पर्नेमा बबई गाँउपालिका ५ निवासी २३ बर्षिय नवराज खत्री रहेको डिभिजन वन कार्यालय दाङका सुचना अधिकारी खिम बहादुर केसीले जानकारी दिनुभयो ।
विना ईजाजत अवैद्य वन पैदावार हानी नोक्सानी, लुकाई छिपाई राखेको र ओसार पसार गर्न लागेको सुचना विशेष सुराकी संयन्त्रबाट प्राप्त भए पछि पुरन्धारा सव डिभिजन वन कार्यालयका सहायक वन अधिकृत सिद्धान्त बरालको नेतृत्वमा सहायक वन अधिकृतहरु संयोग वस्नेत, विष्णु प्रसाद लामिछाने र सशस्त्र वन रक्षक सहितको गस्ती टोलि परिचालन गरिएको थियो ।
गस्ती टोलीद्धारा बबई गाँउपालिका ५ जौवारीमा निवासी खत्रीको घरबाट साल जातका गोलिया ६ दशमलव ५० क्यूफिट सोहि ठाउँकै भुपाल रोकाको घरबाट ६ दशमलव ८३ क्यूफिट चिरान काठ गरी जम्मा १३ दशमलव ३३ क्यूफिट काठ बरामद गरिएको छ । बरामद गरिएको काठ पुरन्धारा सव डिभिजन वन कार्यालमा राखिएको छ ।
त्यसैगरि बबई गाँउपालिका ५ खाल्टेमा सोही गस्ती टोलीले बलबहादुर बुढाथोकिले वन क्षेत्रमा अतिक्रमण गरि बनाएको छाप्रोेमा खानतलासी गर्दा साल जातको अवैद्य चिरान काठ ६२ थान बरामद गरेको छ । काठ लुकाउन बनाईएको काठको अस्थायी छाप्रो स्थानियहरुको रोहबरमा भत्काईएको सहायक वन अधिकृत सिद्धान्त बरालले बताउनुभयो ।
घटनामा संलग्न रहेको आशंकामा पक्राउ परेका व्यक्तिहरुलाई आवश्यक अनुसन्धानका लागि डिभिजन वन कार्यालयमा राखिएको छ । अतिक्रमणकारीलाई वन ऐन २०७६ बमोजिम पाँच वर्ष कैद र विगो असुल गरि १ लाख रुपैया सम्म जरिवाना वा दुवै सजाय हुने व्यवस्था रहेको डिभिजनल वन अधिकृत सवेदीले बताउनु भयो ।
